Ozsoy: Eke muxalefet vajo 'heya' kardî zivirneno xo

Wekîlê HDPyî Hişyar Ozsoyî vat AKP bi tezkereyî do xîret bido ke sîyasetê zereyî dîzayn bikero û vat: ''Eke muxalefet vajo 'heya' do kardî bizivirna û bi destê xo bido Erdoganî.''

Wekîlê HDPyî û Hemvervatoxê Komîsyonê Karanê Teberî Hişyar Ozsoyî derheqê tezkereyê şerî de ANFyî rê qisey kerd. Tezkere ewro do Meclîs de bêro nîqaşkerdene.

Ozsoyî ard ziwan ke AKP wazeno Rojawanî bi temamî çin bikero û bi nê hawayî weçînayîşan de ser bikewo. Ozsoyî da zanayene ke nika ra partîyê muxalefetî wina sînyal danê ke ê do tezkereyê şerê vera Rojawanî rê vajê 'heya.'

Ozsoyî vat: ''No têna planê Erdoganî nîyo, nîjadperestê Tirkîya zî heman çi wazenê. Nê kesî wazenê Rojawanî û pêro destkewteyanê kurdan çin bikerê. Ma xora tezkereyî rê vajê 'ney' û dima zî bibê hedefê hêrişan. Nê welatî de kam şer nêwazo beno 'terorîst.' Îqtîdar wazeno pê tezkereyî sîyasetê zereyî dîzayn bikero û ganî muxalafet nêbo hemkarê ney.''

Ozsoyî bale ante ser ke reya verên a ke tezkereyêk semedê di serran amade beno û bi tezkereyanê Sûrîye û Iraqî yeno yewkerdene. Ozsoyî vat: ''Erdogan eno ke 2023 de serek nêbo la tezkere do dewam bikero. Muxalefet eke bibo şirîkê ney Erdogan eşkeno dinê serran sîyaset dîzayn bikero, kontrol bikero. Eke tezkere bêro qebulkerdene Erdogan eşkeno weçînayîşî asteng bikero.

Bê rayanê muxalefetî zî tezkere qebul beno la eke muxalefet bibo şîrikê ney çekêka pîle kewena destê Erdoganî. Eke muxalefet vajo 'heya' do kardî bizivirna û bi destê xo bido Erdoganî.''