Wan de qedexeyê çalakîyan ame protestokerdene

Wan de rêxstinanê komelê sivîlî qedexeyê aktîvîte û çalakîyan ê ke hezar û 800 rojî yo dewam keno pê eşkerayîyêke protesto kerd.

Wan de îlanê Rewşa Îstîsnayîye ya 21ê temmuza 2016î ra nata 1800 rojî yo qedexeyê aktîvîte û çalakîyan estê. Tewr peyên 25ê teşrîna verêne de Serekê Odaya Tabîban a Wan-Colemêrgî Huseyîn Yavîç û Temsîlkara Weqfa Heqanê Merdiman a Tirkîya Sevîme Çîçek wexto ke eşkerayîye dayêne pê bahaneya 'qedexeyî' ameybî destbendkerdene.

Xeylê rêxistinê komelê sivîlî Salona Konferansî ya Baroyê Wanî de ameyî pêser û vera qedexeyan eşkerayîyêke daye. Endam û îdarekarê HDPyî, aktîvîstê Têgêrayîşê Cinîyan ê Azadan û TUHAY-DER zî tede xeylêk temsîlkar, endam û îdarekarê rêxistinana tewrê eşkerayîye bîyî.

Serekê Baroyê Wanî Zulkuf Uçarî eşkerayîye wende û da zanayene ke qedexeyî goreyê qanûnan nîyê. Uçarî vist vîrî ke heqê merdiman o ke çalakîyan û aktîvîteyan bikerê û dewlete nêeşkena nînan asteng bikera. Uçarî eşkera kerd ke dewlete wazena nê qedexeyan mende bikera û komel nê kerdişan rê vano 'hînî bes o.'

Uçarî vat: ''Ganî na hişmendîya qedexekere ra cade fek bêro veradayene. Ganî dewlete bikera ke pêro merdimî heqanê xo heta peynî bi azadî bîyarê ca. Ma do na babete teqîb bikerê.''