Fînlandîya û Swêdî muracatê NATOyî kerd

Fînlandîya û Swêdî seba endamîya NATOyî muracato fermî kerd. Kremlînî pare kerd ke endamîya NATOyî ya Fînlandîya do Rûsya rê biba gefêk. Prosesê endamîye beno ke serrêke dewam bikero.

Fînlandîya û Swêdî seba endamîya NATOyî roja çarşemeyî muracato fermî kerd. Sekreterê Pêroyî yê NATOyî Jens Stoltenbergî bi eşkerayîyêka çapemenîye da zanayene ke NATOyî bi hawayêkê fermîyî muracat qebul kerdo. 

Efserêkê Rêxistina Îstîxbaratê Pawitişî û nuştox Rebekah Kofflerî rojnameyan rê vat endamîya Fînlandîya û Swêdî do NATOyî bihêz bikera la îxtîmalê gefê çeka nuklere yê Rûsya zî do bizêdîno.

Serekkomarê Tirkîya Erdoganî ra ber 30 endamê NATOyî muracatê wird welayan ercnenê. Wina pawîyeno ke prosesê ercnayîşî do di hewteyî dewam bikero.

Erdogan îdîa keno ke Swêd û Fînlandîya paştî danê kurdan û hêzanê muxalîfan. Erdoganî qiseykerdişê xo de Îstanbul de wina vatbi: ''Ma qewimîyayîşanê Swêd û Fînlandîya teqîb kenê la ma bi asanî tesdîq mekerê.''

Fînlandîya û Swêd eke heqê îtîrazanê Erdoganî ra bêrê beno ke çend hewteyan de bibê endamê NATOyî. A raşte prosesê endamîye qasê serrêke dewam keno la NATO gefanê Rûsya ra semed wazeno bi lezî têbigêro.

Kremlînî hişyar kerd ke endamîya Fînlandîya û Swêdî seba Rûsya gef o û eke no îtîfaq dewam bikero Rûsya do sînorê Fînlandîya de fekê şerî yê nuklerî ca bikerê. La Wezîrê Karanê Zereyî Sergei Lavrovî vat ke endamîya cîrananê înan a seba NATOyî Rûsya rê ferq nêkena.

Swêd 200 serrî yo xo îtîfqan ra dûrî gêno. Fînlandîya zî rijîyayîşê Yewîya Sovyetan ra dima nêbîye terefêk.

Sînorê Fînlandîya 130 kîlometre nêzdîyê Rûsya yo.