Şehîdê menga teşrîna verêne xeylêk şaristananê Ewropa de bi merasîmanê cîya-cîyayan ameyî yadkerdene.

Şaristanê Den Haagî yê Hollanda de bi merasîmêkî şehîdî ameyî yadkerdene. Merasîm de Vervatoxê Komîteya Keyeyanê Şehîdan Metîn Yuceyî û aktîvîste Zeynepe Xelale Bafe qisey kerd û pare kerd ke ê do vera çeka kîmyewîye ya dewleta tirke xo ver bidê. 

Rayberîya Înîsîyatîfê Cinîyan ê Norweçî de şexsê Bêrîtane, Sarya, Ronahî, Şukru Serhad û gerîlayê ke hêrişê çeka kîmyewîye de şehîd bîyî ameyî yadkerdene. Kombîyayîş de fîlmê Bêrîtane zî ame mojnayene.

Meclîsê Cinîyan ê Dest-Danî yê Berlinî de yadkerdişê şehîdan de sînevîzyonêk ame mojnayene û mektuba Andrea Wolf (Ronahî) û rojnuşteyê gerîla Selma Dogan (Zinarîn) ameyî wendene.

Kurdanê Evryî yê Fransa bi merasîmêkî şehîdî yad kerdî. Merasîm de Nupele Munzur û birazîyê şehîd Şukru Serhatî Tarkan Serhatî qisey kerd. Dima sînevîzyonêk ame mojnayene û mewlud ame wendene.

Komeleya Kulturî ya Kurdan a Dresdenî de rayberîya Meclîsê Cinîyan ê Uta de şexsê Bêrîtane (Gulnaze Karakaş) de şehîdê teşrîna verêne ameyî yadkerdene.

Rayberîya Meclîsê Cinîyan ê Viyane de şehîdî ameyî yadkerdene. Merasîm de derheqê şehîdan de sînevîzyonêk ame mojnayene. Merasîm pê sloganan qedîya.