Wekîla Partîya Çepe (Die Linke) Hêlîne Evrîm Sommer vist vîrî ke Meclîsê Federalî yê Almanya 18ê teşrîna peyêne ya 2020î de semedê qedexekerdişê têgêrayîşê nîjadperestî yê Almanya vernîyazêk qebul kerd la serrêke ra nata vernîyaz nêame caardene.

Hêlîne Evrîm Sommer derheqê babete de na eşkerayîye daye: ''Hukmatê Almanya ganî çinhesibnayîşê raştgîrîya tûje ya tirkan ra fek vera bido û biran nêkero qurbanê têkilîyanê bi Tirkîya. Hukmat û Wezaretê Karanê Zereyî yê Federalî nêeşkeno îradeyê Meclîsê Federalî yê Almanya çin bihesibno.

Derheqê rêxistinanê sîwane yê nîjadperestan ê tirkan de Almanya de Federasyonê Komeleyan ê Neteweperestanê Tiran ê Demokratîkan ê Almanya (ADUTDF), Yewîya Kulturî ya Tirk-Îslamî ya Tirkan (ATÎB) û Yewîya Komeleyanê Kulturî yê Tirkan ê Ewropa (ATB) cade bira qedexekerdişî wa bêra dayene. Nê 3 rêxistinê raştgîrî sey raştgîranê tûjan pênase benê. Ganî raştgîrîya tûje bi her hawayî bêra qedexekerdene.''