Komeleya Keyeyanê Şehîd û Vînîbîyayeyan (KOMAW) derheqê hêrişê 20ê çeleyî yê Hesekê de eşkerayîyêke daye. KOMAWî da zanayene ke dewleta tirke cergê DAÎŞî newe ra rêxistin kerdî û seba hêrişî vistî dewre. KOMAWî 17 şerwanê ke şehîd bîyî zî yad kerdî.

KOMAWî vist vîrî ke goreyê agahîyan cergê ke teslîm bîyî û tepişîyayî hetê MÎTî ra Serêkanîyê de ameyî perwerdekerdene û çarçewa planêkê pîlî de têgêrayêne. Eşkerayîye de wina ame vatene: ''Eke ê ser bikewtêne planê rijnayîşê Îdareyê Xoserî rê dewam bikerdêne. Wexto ke DAÎŞ newe awan bibi serkêşanê AKPyî vat 'Çew nêeşkeno DAÎŞî rê vajo terorîst.' Nika vajê 'Ma DAÎŞ vist lîste' zî ê hemkarê DAÎŞ, Talîban, El Nûsra ûsn ê.

Hende hêzê mîyanneteweyî Hesekê de seba çareserkerdişê meseleya endamanê DAÎŞî qels mendî. Ma sey KOMAWî dejê keyeyanê şehîdan zerrî ra pare kenê, ma amade yê ke her tewirê paştdayîşî bikerê.

Ma venga rayumûmîya dinya danê ke vera rêxistina terorî ya DAÎŞî tewirêkê aktîfî bimojnê, paştî medê îdareyê AKPyî û vera tehlukeyê hemparî hetê têkoşînê merdimîye û heqdarî de ca bigêrê.''