Tirkê faşîstê ke Almanya de polîs ê

Bi taybetî mîyanê asayîşê Berlinî de hûmara polîsanê faşîstan ê tirkan zêdîyaye. Rixmê hişyarîya pisporan zî nê polîsî hema zî nawnayîşanê kurdan de yenê wezîfedarkerdene.

RoJa şemeyî paytextê Almanya Berlin de vera hêrişanê îşxalî yê dewleta tirke û PDKyî nawnayîşêko pîl amebi kerdene û nê nawnayîşî de tewirê polîsan zaf bale antbî. Rixmo ke nawnayîş qanûnî bi, polîsan provakasyon kerdbi û xîret kerd ke alozîye virazê.

Dima ke vera qedexeyê serê PKKyî Wezîrîya Karanê Zereyî rê muracat ame kerdene no nawnayîş virazîya. Balkêş o ke nawnayîş de polîsan destê înan ra çi ameyo kerd. Polîsan bi taybetî sloganê 'Biciwîyo Serek Apo' û 'Biciwîyo PKK' xo rê kerdî bahane. Mîyanê nê polîsanê hêrişkeran de polîsê ke eslê xo de tirk ê, est bîyî ke bi tirkî çalakîkeran rê heqaret kerdêne.

Îtîrafê 'Wezîfe merdimanê Erdoganî rê dîyenê'

Reya verêne nîya ke Mudirîya Asayîşî ya Berlinî nawnayîşanê kurdan de polîsanê tirkan wezîfedar kena. Serranê peyênan de medyaya almanan û pisporanê asayîşî na babete de Asayîşê Berlinî hişyar kerdbi. Serebûtê peyênî mojnenê ke Asayîşê Berlînî hîna zaf polîsanê tirkan wezîfedar keno.

Hûmara peyêne ya Kovara Der Sipegelî ya teşrîna peyêne ya 2017î de perwerdekarêkê Akademîya Polîsan a Berlinî îtîraf kerdbi û vatbi: ''Polîsê terefgîrê Erdoganî nawnayîşanê kurdan de yenê wezîfedarkerdene.'' Perwerdekarêkê bînî rojnameyê Berliner Morgenspotî rê heman çi îtîraf kerdbi û vatbi: ''Mîyanê namzetanê polîsan de terefgîrê Erdoganî zaf ê.''

Pê kincanê polîsan torranê dîjîtalan de şov kenê!

Nê polîsê faşîstî xo nênimnenê zî û torranê dîjîtalan de pê kincanê polîsan fotografê xo pare kenê. Bi taybetî 2017 de fotografê kesêkê winasênî mîyanê rayaumûmîya almanan de bibi sebebê nêrazîbîyayîşî. Rêxistina Asayîşî ya Berlinî zî eşkera kerd ke fotograf raşt o û têna vra polîso ke eslê xo de tirk o, tehqîqat dîyayo destpêkerdene. Goreyê texmînan no polîs cayêkê bînî de ameyo wezîfedarkerdene.

Wezîfeyê pawitişê sînagogî dîya faşîstê bi nameyê Tolgayî

2019 de zî polîsê faşîstî Zafer Gulgenî medyaya dîjîtale de bi nuşteyê 'Ma rê her ca dewleta tirke ya' û pê kincanê polîsan fotografê xo vila kerdbi. Rêxistina Asayîşî ya Berlinî nê skandalî ra dima eşkera kerd ke no kes polîs nîyo û vat: ''Ma cigêrenê ke ney çara kincê polîsan dîyê.''

Adara 2022yî de faşîstêkê tirkî yo ke nameyo sexte 'Tolga' nabi xo, bi kincê polîsan o ke ser de alaya tirkan est a, klîbêkê muzîkî weşana. Eşkera bi ke klîb de wina vajîyeno: ''Sereyê kafiran hetê tirkan ra bêrê birnayene, rayîrê Homayî ser de ma amade yê.' No kes zî Asayîşê Berlinî de polîs o.

Selahîyetdarêkê polîsan rojnameyê Die Weltî rê qisey kerd û da zanayene ke polîsê tirkî mîyanê yewinanê capawitişî de yê û heta polîsê tirkî yê faşîstî sersefîrîyan û sînagogêkê Berlinî de ameyê wezîfedarkerdene.

Polîso selahîyetdar MÎTî ra xebitîyeno

2018 de vejîya werte de polîsêko selahîyetdar ê Asayîşê Berlinî MÎTî rê xebitîyeno û derheqê muxalîfanê rejîmê Erdoganî û kurdan de agahîyan arê dano. No polîs serê sûcî de tepişîya. Tehqîqatê vera nê polîsî bi nimitkî dewam keno û nê polîsî îtîraf kerdo ke o endamêkê MÎTî yo. Wezîrê Karanê Zereyî yê Eyaletê Berlinî Andreas Geiselî skandalî ra dima eşkerayîyêke daye û vat: ''Hayîya ma pê îdîayanê serê polîsî est a.''

Îstîxbaratî ra heta BAMFî wazenê bikewê her ca

MÎTî dzgehê dîyanetî yê rejîmê Erdoganî DÎTÎB, konsolosxane, şîrketanê paravan, teşkîlatê polîsan û bankayanê tirkan ra torrêka ajanan awan kerde û keno ke kurdan ser o agahîyan arê bido. Serkomîsere Dundu Yazgan zî ajanêka MÎTî ya û Hessen de beşê 'polîsanê adaptasyonî' de xebitîyena. Têkilîya Yazgane û MÎTî hetê ANFyî ra tebaca 2017î amebî deşîfrekerdene.

Amebi deşîfrekerdene ke 20 açarnayoxê tirkî yê Dayîreyê Koç û Multecîyan (BAMF) seba rejîmê AKP-MHPyî xebitîyenê. Almanya de tewr tay 6 hezar ajan û xebatkarê MÎTî est ê û tehqîqatê vera înan tim sey sembolîkî mendî. 5 serranê peyênan de nêzdîyê 20 endamanê MÎTî rê tehqîqat ame akerdene û nê zî bênetîce mendî.