Dêrsim: 20 serran ra dima agêra dewe la krîz de têrî mend!

Kazim Yildiz 20 serran ra dima agêra dewa xo la krîzê ekonomîkî de têrî mend. Yildizî vat: ''Ma vayan ra nefes nêgênê. Nêeşkenê debara xo bikerê.''

Dewa Harşîye ya qezaya Pilemurîye ya Dêrsimî 1992 de bi bahaneya 'asayîşî' amebî vengkerdene. Kazim Yildizo 52 serre 20 serran ra dima agêra dewa xo û cuyêka newîye awan kerde.

Yildizî dewe de 2012 de keyeyê xo tamîr kerd û hewilîya ci. Yildiz dima zî bi keyayê dewe. La 2014 de wezîfe ra ame dûrvistene. Yildizî zî seba debare heywankarîye û hingdarîye kerdêne. La babîyê 3 domanan Hasan Yildiz binê krîzê ekonomîkî de yo. Keyeyê Yildizî seba ke vaya simer, genim û mazotî ra hele mende ke heywananê xo biroşo.

Yildizî da zanayene ke înan pê kredî 150 mêşnayî hêrînayî la nêeşkenê simerê înan bihêrînê. Yildizî vat: ''Tonê simerî bîyo 5 hezar TL. Her çi zaf vay o, ma pê heywankarîye nêeşkenê debara xo bikerê. Ma 400 lîra danê torbayêka ardan. Yew wesayîtê min ê bi tupî esto. Verî ma 150 lîra dayêne tupêk. Nika o zî bîyo 350 lîra. 

Ganî ma rê paştî bêra dayene. Citkarî nêeşkenê 14 lîra ra mazot bigêrê. Ez neçare menda ke traktorê xo biroşa. Çunke ma zerar kenê. Seba ke ma nêeşkenê kredîya xo bidê, vera wextê zêdeyî wazenê. ''

Yildizî pare kerd ke lajê ci mezunê zanîngehî yo la seba ke karêk nêdîyo heywankarîye keno. Yildizî vat: ''Lajê mi nika vano o do şorê teberê welatî. Ma nêeşkenê biewnê heywananê xo ra, ma kenê ke pê simerê wişkî pîzeyê înan mird bikerê. Kapasîteya axûrê ma 500 heywanan gêna la têna 150 heywanê ma estê.''