Îhaleyê santralê termîkî yê Çewlîgî ra bara sîyasetmedaran

Wekîlê HDPyî yê Çewlîgî Aydemîrî vat: ''Bedelê îhaleyê santralê termîkî yê Xelîfanî 2 mîlyar TL yo û goreyê îdîayan ney ra se ra 25 sey komîsyon dîyeno tay sîyasetmedaran.''

Dewa Xelîfanî ya qezaya Kanîreşî ya Çewlîgî de îhaleyê 'santralê termîkî yê rezervê komirî' bi bedelê mîlyarêk û 959 mîlyon 750 hezar TL dîyabi Şîrketa Zîver Înşaatî. 

Goreyê zanayîşanê peyênan  seba ke bedelê îhaleyî kêm o hetê dezgehê eleqedarî ra ameyo betalkerdene la nîno zanayene ke yewna îhale do bêro kerdene ya nê. Çewlîgijî wazenê ke wa proje bi temamî bêro betalkerdene.

Şîrketa Zîver Înşaatî  ya ke  wayirê ci  Veysel Demîrcî weçînayîşê 2015î de AKPyî ra bibi namzet 2018 de zî bi usulê dewatî û bi bedelê 100 mîlyon TL viraştişê rayîrê Çewlîg-Sarjanî girewtbi.

Wekîlê HDPyî yê Çewlîgî Erdal Aydemîrî derheqê îhaleyê santralê termîkî de qisey kerd û  vat: ''Bedelê îhaleyê santralê termîkî yê Xelîfanî 2 mîlyar TL yo û goreyê îdîayan ney ra se ra 25 sey komîsyon dîyeno tay sîyasetmedaran.''

Aydemîrî pare kerd ke vera cografyaya kurdan polîtîkayê şerê taybetî yenê kerdene û talanê ekolojî bi hawayêkê sîstematîkî yenê caardene. Aydemîrî vat: ''Sînorê Xarpêt-Dêrsim-Çewlîgî de serê Awa Pêrî de 9 HESî virazîyayê. Nika yeno waştene ke Xelîfan de rezervê komirî bêro awankerdene û dima zî tede santralo termîk bêro ronayene. Nîsbetê tanîya Xelîfanî seba nê santralî cara munasîb nîyo. Ma ney ra fam kenê ke no santral seba rantî yeno ronayene. No santral do şaristanî jehrî bikero, nêweşîya kansero ke serranê peyênen de cara Çewlîg de zêdîyayo, vila bikero, zerar bido heywankarî û zîretî. Hetê bînî ra Çayê Gornukî yo ke awa ci şina pêro Çewlîgî do biherimîyo. Weşî, cografya û xozaya Çewlîgî bi nê santralî yenê pêşkêşkerdene.''

Aydemîrî ard ziwan ke Komîsyonê Ekolojî yê HDPyî, rêxistinê komelê sivîlî û Baroyê Çewlîgî nê projeyê santralî nêzdî ra teqîb kenê û vat: ''Ma bi destekê şarê Çewlîgî warê huqûqî de pêro heqanê xo bişuxilnê. Ma do nêverdê ke xoza, awanî, çime, warê cuye û weşîya şarê Çewlîgî bêrê pêşkêşkerdene. Ez venga şarê Çewlîgî dana ke wa hîsgerîya xo rê dewam bikero. Qerardarîya şarê ma hêz dana ma. Ez venga wekîlanê Çewlîgî dana ke yew eleqeyê na babete bi îdeolojî, polîtîka, partîbîyayîş û madî çin o. Bêrê ma pîya verê viraştişê nê santralî bigêrê. Ma bi paştdayîşî xoza û merdimanê Çewlîgî bipawê. Eke wina nêbo şarê Çewlîgî do şima û kerdişê şima xo vîr a nêkero.''