Projeyê islahî Gelîya Munzurî rê gef waneno

Gelîya Munzurî de projeyê islahê layî dewam keno û proje texrîbatêkê pîlî virazeno. Av. Bariş Yildirimî vat: ''No proje vera huqûqî yo.''

Hêriş û talanê vera xozaya Dêrsimî dewam kenê. Karanê Awe yê Dewlete (DSÎ) Gelîya Munzurî de projeyê islahê layî dabi destpêkerdene. Projeyî reyde texrîbatêko pîl virazîya.

Avûkat Bariş Yildirimî derheqê babete de eşkerayîyêke daye. 

Yildirimî da zanayene ke xebatê DSÎ peyzajê xozayî yê herême vurnenê. Yildirimî vat: ''Goreyê qanûnî gereka awanîya xoza ya layan bêra pawitene. Masêya Munzurî ya ke dinya ser o têna Çemê Munzurî de esta warê hakkerdişê înan pê makîneyanê karî xeripîyenê. Ganî selahîyetdarî nê xebatan biqedînê û xoza bivurnê halê ci yê verênî.''