Îdarekarê Merkezê Komelê Ziwan û Cigêrayîşî yê Arsîsa Mahmut Palayî û nuştox Şahabettîn Demîrî ANFyî rê derheqê rewşa kurdkî de qisey kerd.

Mahmut Palayî da zanayene ke dewleta tirke tim kurdkî qedexe kerdêne û no qedexe hema zî dewam keno. Palayî vat: ''Dewleta tirke nêverdena bi ziwanê xo bizanê, biwanê û binusê. Ganî kurdî wayîrê ziwanê xo vejîyê. Eke ma ziwanê xo nêpawê do çin bibo ke armancê dewlete zî çinkerdişê ziwanê ma yo. Bê ziwanê dayîke merdim nêeşkeno xo bişinaso. Rixmê hende teda û qedexeyan zî heta nika kurdan ziwanê xo ra fek vera nêda. Ganî pêro kurdî domananê xo de, her ca de bi kurdkî qisey bikerê, biwanê û binusê. keye seba kurdkî mektebêk o; ganî dadî û babîyî zî bibê mamostayêk/e. Kurdê ke bi tirkî qisey kenê wa xo ra bişermê.''

Nuştox Şahabettîn Demîrî dîyar kerd ke asîmîlasyon sey qirkerdişî sûcê vera merdiman o û dewleta tirke vera kurdan nê sûcî kena. Demîrî vat: ''Perwerdeyê bi ziwanê dayîke hetê peymananê  mîyanneteweyîyan ra zî yeno qebulkerdene la dewleta tirke ney nêana ca. Nê rojan de mîyanê şarî de ziwanê têkilîye bîyo tirkî. Na babete de mesuldarîyêka pîle kewena keyeyanê kurdan ser. Ganî dadî û babîyî tim bi kurdkî domananê xo de qisey bikerê.''