Hemsereka KCD'yî û parlamentera HDP'yî ya Colemêrgî Leyla Guvene, seba wedaritişê tecrîdkerdişê Rayberê Şarê Kurdî Abdullah Ocalanî 91 rojî yo grevê vêşanîye de ya. Seba paştîdayîşê Leyla Guvene vizêrî Meclîsê Tirkîya de “Nobeta Haştîye” dest pêkerdebî. Çalakîya nobete ewro qedîyaye.

Hemserekê pêroyî yê HDP'yî Pervîn Buldan û Sezaî Temellî zî mîyan de zaf parlamenterî tewrê çalakîye bîyî. Nobeta Haştîye ewro şewdir ameye caverdayene. HDP’yîyan ard ziwan ke, seba wedaritşê tecrîdî û grevanê vêşanîye rojanê verê ma de bi çalakîyanê cîya-cîyayan nê waştişan do bîyarê rojdem.

Pervîn Buldane vat, “Seba ke Leyla Guvene biciwîyo, seba ke hevalê ma yê ke hepisxaneyan de grevê vêşanîye de yê biciwîyê, ma  na çalakîye viraşte. Ma do qetî haştî, edalet û azadîye bîyarê nê welatî. Ma pê bawer ê ke no zî bi wedaritişê tecrîdî mimkun o.”