Dîwanê Hemserekîye yê KCDK-E bi eşkerayîya nuştekîye semedê tewrbîyayîşê çalakîyanê 14ê tebaxe ke do pêro welatanê Ewropa, Kanada û Awusturya de bêrê kerdene, veng da.

KCDK-E  vat: ''Herra Kurdîstanî binê îşxalê dewleta tirke ya îşxalkere de ya. Îqtîdarê AKP-MHPyî seba ke vînîkerdişê xo binimno pê heme metodanê leyminan Kurdsîtan de qirkerdişan rê dewam keno. Artêşa tirka ke rixmê heme hêrişanê xo vera xoverdayîşê kurdan ser nêkewena pê şuxulnayîşê gazê kîmyewîyî sûcê şerî kena.

Reyna baregehê leşkerî yê dewleta tirke yê ke Başûrê Kurdîstanî de ameyî ronayene, înan ra zî vera şarê sîvîlî kerdişê terorî yenê kerdene. Tewr peynî de Eyn Îsa de eynî keyeyî ra 4 kesan hêrişê îşxalkeran de dinyaya xo bedilnaye.

Îqtîdarê faşîstê Tirkîya açarnaye hepîsxaneyî  hetê bînî ra zî pê polîtîya nîjadpereste şaran verdano yewbînan. Wazeno ke mabênê şaran de pêkewtişî vejîyê. Şewatê daristan zî erzeno kurdan ser û vera şarê sîvîlî hêrişê lînçkerdişî organîze keno. Qirkerdişê Konya ke eynî keyeyî ra 7 kurdî ameyî qetilkerdene zî netîceya na polîtîkaya îqtîdarî de ame kerdene.

Vera nê heme qirkerdiş û hêrişan sere de rayraşîyayîşo merkezî yê Dusselldorfî 14ê tebaxe de heme welatan de ma do vejîyê meydanan. Wezîfeyê heme kurdan û demokratano ke tewrê nê çalakîyan bibê. Nê çalakîyê hetê Defend Kurdîstan o ke dostanê ewropayîjan nayo ro û dezgehanê kurdan ê Ewropa ra yenê organîzkerdene. Semedê wayîrvejîyayîşê Kurdîstanî ganî 14ê tebaxe de her kes vejîyo kuçeyan û bi ruhê seferberîye vera qirkerdiş û îşxalî vengê xo berz bikerê.''