Hemsereka KCD‘yî Leyla Guvene, seba ke tecrîdê serê Rayberê Şarê Kurdî Abdullah Ocalanî bêro wedaritene 101 rojî yo ke grevê vêşanîye de ya. Destpêkerdişê grevê vêşanîye yê Leyla Guvene ra dima Kurdîstan û welatanê cîya-cîyayan de grevê vêşanîye bîyî zêde û Strasbourg de, bi beşdarîya 14 kesan, grevê vêşanîye zî kewt roja xo ya 62’yîne.

Rewşa weşîye ya xoverdayoxanê grevê vêşanîye her ke şona bena girane û na asta krîtîke de, dewletê Ewropa bêvengîya xo domnenê. Nê dewletanê bêvengan ra yewe zî Almanya ya. Partîya Çepgire Meclîsê Federal ê Almanya de  na mesela arde rojdem û waşt ke hukmatê Merkele no derheq de helwestê xo bikero eşkera.

Qaso ke ANF’yî çimeyanê nêzdîyê Partîya Çepgire ra malumatî girewtê, parlamenterê Partîya Çepgire Gokay Akbulutî, seba ke hukmatê Merkele cewab bido, derheqê grevê vêşanîye de, Meclîsê Federalî de persî persayî.

Persê ke ameyê perskerdene wina yê:

“Seba ke tecrîdê serê Abdullah Ocalanî yo ke Tirkîya de girewte yo bêro wedaritene, grevê vêşanîye ameyê destpêkerdene û nê grevan de hemwelatijê Alman û kesê ke Almanya de wayîrê destûrê roniştişî yê estê yan çin ê û Hukmato Federal no derheq de wayîrê senî zanayîşan o?

Hukmato Federal derheqê grevê vêşanîye yê ke bi talebê tecrîdê serê Ocalanî bêro wedaritene ameyê destpêkerdene de wayîrê senî zanayîşan o? Hetê bînî ra eke xoverdayoxê grevê vêşanîye yê ke hetê weşîye ra restê asta krîteke ke bimirê Hukmato Federal do se bikero û no derheq de  texmîn keno ke senî çiyî do bêrê qewimîyayene?“

Nê persî seba ke Wezîrê Karanê Zereyî Horst Seehofer û Wezîrê Karanê Teberî Heîko Maasî rê ameyî perskerdene û Seehofer û Maas do hewteyê vernîya ma de yan bi vatiş yan zî bi nuştiş cewab bidê nê persan.

HUKMATÊ MERKELE BEYANATÊ XO YÊ DERHEQÊ TECRÎDÎ XO VÎR RA KERD!

Partîya Çepgire, menga Çele ya derbazbîyayîye de reyna derheqê tecrîdê Îmraliyî de, hukmatê Merkele ra persî persaybî û na mesela Meclîsê Federalî de ardebî rojdem. Cewabê na perse 16’ê Çele 2019’î de, hetê Mîchael Roth o ke wezîfedarê Wezaretîya Almanya yê Karanê Ewropa yo ra ameyebî cewabkerdene. Rothî cewabê perse de vatbi, Tirkîya seba ke îmza eşta peymananê mîyanneteweyîyan, ganî tecrîdî wedaro û goreyê peymanan tê bigêro.

Rothî waştbî ke wa tecrîdê serê Rayberê Şarê Kurdî Abdullah Ocalanî ser bêro wedaritene û vatbi ganî Ocalan keye û avukatanê xo bivîno. La hukmatê Merkele, hîna mabên ra yew aşme derbaz nêbîya beyanatê xo xo vîr ra kerdî û seba ke grevê vêşanîye bêrê qedênayene qet çîyêk nêkerd û duştê hukmatê Tirkîya de, qet yew game nêeşte.