Vera tecrîdo ke dewleta tirkî serê Rayberê Şarê Kurdî Abdullah Ocalanî de  dana domnayene  Ewropa de çalakîyî vila benî. Vizêr reyna xeylî welatan de tecrîd û qerarê Amerîka ameyî protestokerdene.

MARSÎLYA: Bajarê Marsîlya yê Fransa de  verê walîtîye û konsolosxaneyê Amerîka de çalakîyêk ameye viraştene. Çalakwanan bi alayanê PKK û KCKyî qerarê Amerîka şermezar kerd.

BORDEAUX: Bajarê Bordeauxî de zî  rayberîya Têgêrayîşê Ciwanên Şorişgêrî  de çalakîya bêîtaatî ya sivîle ameye viraştene. Çalakwanan qerarê Amerîka protesto kerd û azadîya Ocalanî waşte

HAMBURG: Bajarê Hamburgî yê Almanya de zî çalakîya protestoyî estbî. Çalakwanan mîtîngî de qerarê Amerîka şermezar kerd û mesajê xurtkerdişê mucadeleyî dayî. Çalakîyê Hamburgî do hewtêyek bêmabên dewam bikerî. Çalakîya ewro saat 17.00 semtê Jungferstieg de do bêro viraştene.

CENEVRE: Bajarê Cenevre yê Swîsre de zî Têgêrayîşê Ciwanên Şorişgêrî  çalakî organîze kerde. Verê Ofîsê Yewîya Mîletan de bi çalakîya xeyme ke do hîrê roje bêro dewamkerdene ameyî destpêkerdene.

BERN: Bajarê Bernî de zî semedê protestokerdişê tecrîdê serê Ocalanî û qerarê Amerîka çalakîyêk ameye viraştene.

STOCKHOLM: Bi heman waştişî bajarê Stockholmî yê Swêdî de zî kurdîstanijî û dostê înan meydanan de bî. Verê Parlamento de xeyme ameye ronayene.

ATÎNA: Paytextê Yûnanîstan Atîna de zî çalakwanan çalakîya nobete qedîna û da zanayene ke ê do bi çalakîyanê cîyayan mucadeleyê xo rê dewam bikerî.

BRUKSEL: Paytextê Belçîka Brukselî de zî vera qerarê Amerîka kurdîstanijî kuçeyan de bî. Çalakwanan qerarê Amerîka protesto kerd û azadîya Ocalanî waşte.