Wezîrê Karanê Teberî yê Îsraîlî Gideon Sa'arî vizêr Wezîrîya Karanê Teberî de bi çimeyanê sîvîlan kombîyayîşê xebetî kerd û tîya rewşa Sûrîye erjnaye û bale ante tehdîtanê vera Sûrîye û bêîstîkrarîya hukmatê neweyî ser.

Gideon Sa'arî wina vat:  ''Her hetê dinya de qala bedilnayîşê rejîmê organîzeyî yena kerdene la bi hewayêkê demokratîkî hukmato newe nêameyo vîjnayene û Sûrîye îdare nêkeno. No çeteyêko terorîsto ke verî Îdlîb û dima paytext Şam û herême bînî fînayî dest. Dinya raşta zî wazena ke înan de rejîmêkê newe û biîstîkrarî bivîno. Çunke welatî wazenê ke sûrîyeyijan peyser bişawê. La rewşe wina nîya. Elewîyan reyde pêkewtişî est ê. Tehdîtê eşkera yê Erdoganî est ê ke xoserîya kurdan werte ra wedaro û vera cemaatê xirsîtîyanan tacîzî est ê.''

Sa'arî vat, ''hukmato newe rejîmêko îslamî yo ke cehd keno ke heme Sûrîye ser o kontrolê yewbîyayî awan bikero.''

Walîyê Şamî Mahir Merwan bi nameyê rayberê HTŞyî Ahmed el-Şara NPRyî rê qisey kerd ke sazîya çapemenîya pêroya ya Amerîka ya. Merwanî wina vat:  ''Ma Îsraîlî ra nêtersenê û problemê ma bi Îsraîl nîyo. Ma nêwezanê asayîşê Îsarîlî ya zî yewna welatî tehdît bikerê. Ma haştîye wazenê.''