Îzmîr de berê elewîyan ame nîşankerdene: 'Elewîyan rê merg'

Berê keyeyê hemwelatî Yalçın Acarî yo ke Îzmîr de ciwîyeno ra gefê “elewîyan rê merdene” nusîya û nîşanê reykî nîya pa.

Hemwelatî Yalçın Acaro ke Îzmîr de ciwîyeno vat ke berê keyeyê ey ser o gefê “Elewîyan rê merg” nusîyayo û nîşanê reykî nîyayo pa.

Acarî seba ke kêneyanê xo binayo serwîsê dibistanê ra ber akerdo û nîşanê reykî dîyo. Acarî vat ke “No şodir seba ke ez kêneyanê xo binaya serwîsê dibistanî ra  mi berê xo akerd û nuşteyê ‘elewîyan rê merg’ û nîşanê reykî dî. La seba ke kênayê mi metersê ez verê berî de vineta. Mi ey serwîsî ra kerdî espar. Ez kena ke fehm bika gelo çi qewemîyeno. Ez û cinîya xo ma elewî me. Ma bi serran Komela Pîr Sultanî de wezîfe girewt, şaxanê ciwanî de xebitîyayme." Yalçın Acarî vat ke taxe û apartmano ke tey ronîşenê de înan çirey kesî de munaqeşe nêkerdo. 

 “Ez Do Gereyê Sucî Mekera''

“Ewro ez û cinîya xo ma birapor îme. Çîyo zaf balkêş o ke demo ke ma her diyî zî keye de bîme na yewe ameya kerdene.  Seke yew ma teqîb bikero û bizano ke ma birapor îme.” Yalçın Acarî dewamê qiseyanê xo de vat ke heta ewro kesî gefeko winasî bi înan nêwendo. Yalçın Acarî, cewabê persa “gelo şima gereyê nê sucî kerd” zî wina da:  “Ez tersena ke gereyê nê sucî bikera, ez tersena ke xebere bida polîsan. Emser semtê Yamanlarî yo ke  vîstirîya mi tey ronişena de yew serebûto winasî qewemîya. Tayenan galê elewîyan kerd ke înan lînç kerê û polîsî çirey mudaxele nêkerd. Ez tersena ke no serebût bêro mi sere zî. Ez fikirîyena ke polîs do mi mepawo. Coka ez do gereyê sucî mekera.”