Şarê Colemêrgî çalakîya Guvene rê wayîr vejîyeno
Şarê Colemêrgî paştî dano Leyla Guvene ya ke zîndan de seba wedartişê tecrîdê serê Ocalanî grevê vêşanîye de ya.
Şarê Colemêrgî paştî dano Leyla Guvene ya ke zîndan de seba wedartişê tecrîdê serê Ocalanî grevê vêşanîye de ya.
Çalakîya hemsereka KCDyî û parlamentera HDPyî ya Colemêrgî Leyla Guvene çend şino vila bena.
Hemwelatijanê Colemêrgî yê ke ANFyî rê qisey kerd, ard ziwan ke Guvene parlamenter û îradeyê înan a û ê kîşta aye de yê.
Hemwelatijan ra Fatma Turane vist vîrî ke Guvene bîlaheq zîndan de yena tepiştene û va: ‘‘Ma çalakîya Guvene rê wayîr vejîyenî. Weçînayîşî ser a 6 mengî ravêrtî ma hema parlamentera xo nêdîya. Ma wazenê ke parlamentera ma cayê ma de bo. Waştişê Guvene waştişê ma pêrunan o. Ma seba weşîya Birêz Ocalanî qisewet kenî. Ganî tecrîdê serê Rayberê ma bêro wedartene.‘‘
HEPSKERDIŞÊ KURDAN ÇARE NÎYO
Necmetîn Acarî zî çalakîyê paştîdayîşê Guvene ardî vîrî û va: ‘‘Ganî tecrîdê serê Birêz Ocalanî cade bêro wedartene û meseleyê kurdan bi aşîtî bêro halkerdene. No mesele bi hepskerdişê kurdan çareser nêbeno. Şarê kurdî do tim bi xoverdayîşî cewab bido.‘‘
HER KES GANÎ WIRZO LINGAN SER
Îsmaîl Keskînî zî Ocalan sey îradeyê bi mîlyonan name kerd û wina domna: ‘‘No tecrîdo ke serê Birêz Ocalanî de yeno domnayene, ma esla qebûl nêkenî û çalakîya parlamentera xo Leyla Guvene silam kenî. Waştişê Guvene waştişê ma yo. Ganî heme merdimîye seba wedarnayîşê tecrîdî wirzo lingan ser. Tecrîd sucê merdimîye yo. Coka çalakîya Guvene zaf bierj a.‘‘