Xebatê îqtîdarê AKP-MHPyî Almanya de rojdem de yê. Menga hezîrane de paytextê Avusturya Viyana de komanê faşîstanê ke AKP-MHPyî paştî danê ci, hêrişê faşîstî kerdbî. Dewleta Avusturya 4 hêrişkerî tesbît kerdbî. Dima eşkera bi ke nê kesî komeleya AKP û MHPyî ya Almanya ra yê û MÎTî reyde têkilîya înan esta.

Peynîya temmuze de zî vejîya werte ke ulkucîyê MÎTî dekewtî artêşa Almanya. Servîsê Îtîxbaratê Leşkerî yê Almanya vat ke înan wina 4 kesî artêşe de tesbît kerdî. Îstîxbaratî dabi zanayene ke Komeleya Kultur û Îslamî ya Ewropa (ATÎB) zî ganî bêra teqîbkerdene.

Almanya de konsolosxane, komele, camî, banka û acentayî seke şubeyê MÎTî yê xebitîyenê. Zanayîşê derheqê kurdan û muxalîfanê Erdoganî de arê dîyene û erşawîyenê Anqara.

Yewîya Demokratan ê Tirkan a Ewropa (UETD)ya ke 17 welatanê Ewropa de 253 şubeyê ci estê  Dezgehê Deniz Feneri mabênê 2002-2007î de qasê 41 milyon euroyî bexş arê dabi û şawitbi UETD.

Yewîya Tirkan a Îslamî ya Karanê Dîyanetî (DÎTÎB)a ke Almanya de 900 camîyê ci estê şubeyanê tewr pîlan ê Almanya ra yew a. Mala û îmamê DÎTÎBî bi hawayêkê taybetî yenê weçînayene û erşawîyenê Almanya ke ajanîye bikerê. Serra 2017î de wexto ke mabênê Merkele û Erdoganî xiran bibî  derheqê 19 wezîfedaranê DÎTÎBî de tehqîqatêk dîyabi destpêkerdene. Wextê hêrişanê vera Efrînî de zî nê camîyan ra dûayî ameyî wendene. Nê camîyî seke cayê xopawitişî yê DAÎŞî yê.

Şaristananê Belin, Dusseldorf, Frankfurt, Hamburg, Hannover, Karslruh, Koln, Mainz, Munih, Nurnberg û Stuttgart de zî konsolosxaneyê tirkan sey şubeyê AKP-MHPyî seba ajanîya MÎTî xebitîyenê. MÎT bi nê hawayî banka, acenteyanê turan û şîrketanê bînan zî sey paravan xebitneno.

Partîya Demokratan ê Sosyalan (SPD) sey partîya tirkan zanîyena. Reyna eşkera bi ke AKP CDU û Partîya Keskan de zî xo rêxistin kerd. AKPyî CDU de bi nameyê 'Misilmananê Yewîye' komêke awan kerde. Heman wextî de terefgîranê rejîmê Erdoganî  bi nameyê Îtîfaqê Demokratan ê Almanan (ADD) partîyêke awan kerde ke serekê ci terefgîrê Erdoganî Remzî Aru yo.

‘Osmanen Germania’ (Osmanijê Almanya) serra 2014î de sey klubêkê boksî ronîyabi. La kome serebutanê şîdetî û amadekarîya sûîkastan ra rojdemê Almanya de bîye. Koma çekdare temmuza 2018î de heta Wezîrê Karanê Zereyî Horst Seehoferî ra amebî qedexekerdene. La kome xebatanê xo dewam kena.

Kanûna 2017î de eşkera bi ke wekîlê AKPyî Metîn Kulunkî seba ke xo rê çekan bigêra pere erşawit kome. Ame waştene ke bi nê çekan kurdî bêrê hedefkerdene. Serekê cergan Mehmet Bagci û Selçuk Şahîn serra 2018î ameybî tepiştene. La nê cergan rê têna sûcê edlî ra ceza dîyaye.