Nuştoxê rojnameyê Yenî Yaşamî Huseyîn Akyolî serranê 1990an ra nata rojnameyanê Halk Gerçegi, Ozgur Ulke, Ozgurlukçu Demokrasi de nuşt û edîtorîye kerde. Aykolî îfade kerd ke exlaqê medya hînî nêno caardene û hîşmendîya rojnamegerîya muxalîfe kêmîyaye. Aykolî pare kerd ke prosesê yewdestîya medya dest pêkerd û vat: ''Yewdestîye reyde xebitnayîşê makîneyan zêdîya. Bi nê hawayî merdimê dewlemendî bîyî wayîrê organanê medya. Merdimê zengînî rojnameyan sey holdîng sey çeke xebitnenê. ''

Aykolî vist vîrî ke rojnameyî serra 2002î ra nata sey hêzê sermayeyê neweyî û îqtîdarê yew partî kar kenê û vat: ''Nê rojnameyî têna kar û vatişanê îqtîdarî kenê manşet, hewce nêkenê ke cigêrayîşan bikerê û xeberanê zûran amade kenê. Wexto ke ma xeberanê xoverdayîşî, xeberanê muxalîfan kenê ê ma rê vanê 'Şima xepiyînê' yan zî 'Ajîtasyon kenê.' Îdîa kenê ke ma goreyê krîteranê rojnamegerîye tênêgêrenê. Eqsê ci ê goreyê exlaqê medya tênêgêrenê.

Hîşmendîya ma ya azadîya çapemenîya cîya ya. Goreyê azadîye a ya ke medya rixmê teda û zorbazîya hukmatî raştîyan vaja. Ma terefgîrê sermaye nê terefgîrê kede yê. Ma şaşîyanê sermaye, banka, generalan vanê. Hîşmendîya ma ya çapemenîye na ya. Coka ma seba xo vanê 'çapemenîya azade.' ''