Xeberê ke vanê hêzê şerî yê tirkan Efrîn de cinîyanê êzidîyan zîndanêkê nimitkîyî de tepişenê rojdemê Parlamentoyê Almanya de yê. Nameyê Hukmatê Federakî yê Almanya ser o Wezîre Dewlete Michael Rothî cewab da vernîyazê persî û vat: ''Ma xeberan ra ke herême ra yenê qerqilîyenê.

Komelê Şaranê Binê Tehlukeyî yo ke merkezê ci şaristanê Gottingenî yê Almanya de yo, eşkera kerdbi ke cergê Tumenê Hamzayî yê pabesteyê artêşa tirke, cinîyanê Efrînî remnenê û zîndanêkê nimitkîyî de tepişenê. Pisporê Rojhelatê Mîyanênî yê dezgejî Kemal Sîdoyî îfade kerdbi ke sey wextê DAÎŞî vera cinîyanê êzidîyan hêrişî yenê kerdene. Wekîla Partîya Çepe Gokay Akbulutî zî babete berde rojdemê Meclîsê Federalî û persa ke Hukmato Federal do derheqê babete de çita bikero.

Nameyê Hukmatê Federalî yê Almanya ser o Wezîrê Dewlete yê Yewîya Ewropa ra Berpirsîyar Michael Rothî cewab da wekîl Akbulut. Rothî vat: ''Xeberê Rojawanî bi taybetê êyê ke derheqê êzidîyan de yê ma zaf qerqilnenê. Hukmat nêeşkîya nê xeberî sererast bikero û erkê Almanya nîyo ke derheqê sûcanê Tirkîya de mehkeme rono. Ganî hînî dejê herême biqedê, alozîya herême kêm biba û şarê sivîlî bêro pawitene. Ma seba nînan xîret kenê.''

Wekîla Partîya Çepe Gokay Akbulutî ANFyî rê derheqê babete de qisey kerd û vat: ''Cewabê Hukmatê Federalî qîm nêkeno. Ganî sûcê Tirkîya pey goş nêbê û Tirkîya Mehkemeya Sûcanê Şerî ya Mîyanneteweyîye de ganî bêra hukmkerdene. Ganî Almanya na babete ser o rolêkê aktîfî bigêra xo ser. Hukmato Federal vano ke ê qerqilîyenê. Eke raşta zî wina yo ganî vera Tirkîya ambargoyê çekan bixebitnê. Çunke Efrîn de ê sûcê giranî pê çekanê almanan yenê kerdene.''