Endamê Heyetê Rayberdişê Merkezî yê HDPyî Alp Altinorsî bêqîmetbîyayîşê lîraya tirkan ê vera dolarî ANFyî rê ercna. Alp Altinorsî îfade kerd ke Tirkîya de meseleyanê esasan dest pêkerd û bale ante polîtîkayanê şerî yê îqtîdarî ser. Altinorsî da zanayene ke wextê janî de her kes bi şahîd ke modernîteya kapîtalîste senî rijîyena û sebebê pêro meseleyan kapîtalîzm o.

Altinorsî vat: ''Şar zî hînî pê hesîya ke tay meseleyî estê. Şerê AKP-MHPyî welat visna nê halî. Blokê şerî herême de bi şerî têgêreno.Hukmat do nêeşko ekonomî gandar bikero. 

Tirkîya de nika bêkarîye asta tewr berze de ya. Na pandemî de dîya ke kapîtalîzm bi xo nêweşîyêk a. Tirkîya hînî seke bîya welatêko kolonyal. Hamleyê leşkerî yê îqtîdarî kenê ke çimeyê welatî biqedê. 

Meseleya kurdan sebebo tewr pîl ê nê krîzê ekonomîkî yo. Erdoganî wexto ke muzakereyî vindarnayî berê krîzê ekonomîkî kerd a. Goreyê hîşmendîya înan xebitnayîşê hêzê leşkerî meseleyan çareser keno. Îqtîdarî vat 'Ez eşkena bi rayîrê leşkerî meseleya kurdan çareser bikera' û a hele planê çinkerdişî amade kerd. Bi nê hawayî înan adir verda Rojhelatê Mîyanênî. atmosferê dîyaloganê 2013-14î de rewşa cîya bibî.

Nê pêro 7ê hezîrane de vurîyayî. 5 serran ra nata no nêzdîbîyayîş Tirkîya keno tarî. Nika her çi seba şer û artêşe yeno berardene. Nê wextî de ke wasfê milîtarîzmî hende dîyeno xora ekonomî zî çin beno.  Haştîye ewro qasê nanî girîng a. Eke hatîye çin a nan zî çin o.''