Meydanê Garî yê Anqara de 10ê teşrîna verêne ya 2015î de DAÎŞî hêrişê nawnayîşê HDPyî kerdbi û hêriş de 103 kesî ameybî qetilkerdene. 

Rayberîya Komeleya Paştdayîş û Haştîye ya 10ê Teşrîna Verêne de 103 kesî Meydanê Garî de ameyî yadkerdene. Merasîm goreyê tedbîranê vîrusê Korona ame kerdene.

Îdarekarê Komele Îhsan Seylanî merasîm de qisey kerd û vat: ''Ma do her ca de vajê haştîye. Înanê ke 10ê teşrîna verêne de tîya de bîyî haştîye waştêne. Ma do alaya înan a haştîye, demokrasî û kede berz bikerê, têkoşînê xo dewam bikerê. 5 serrî nê 500 serrî zî derbaz bibê ma do nameyê qurbanan bîyarê xo ziwanî.''

Merasîm de qurbanê teqayîşê Beyrûtî zî ameyî yadkerdene.