Parlamentera HDP’yî ya Êlihî û endama Komîsyonê Huqûqî Ayşe Acar Başarane derheqê sîstemê huqûqî yê dewleta Tirkî de ANF’yî rê qisey kerd.

Başarane vist vîrî ke dimayê hewldayîşê derbeya 15’ê Temmuze  hukm temamî de goreyê îtîfaqê AKP-MHP’yî tê gêreno û va: ‘‘Xora ma zanê no welat çi rey goreyê huqûqî nêame îdarekerdene la nê 34 serrî yo hukm goreyî îqtîdarî vera şarî yeno rayraberdene. Nika paketê hukmî yo newe ame eşkera kerdene. Heman roje de birêze Fîgen Yuksekdage û birêz Selahattîn Demîrtaş reyna ameyî tepiştene. No zî xora nîyetê îqtîdarî yê pakatê hukmî eşkera ramojneno. Ewro zîndanî bîyî pirr,  ca çîno ke tepişteyî tede bimanê û cenazeyê tepişteyanê nêweşan vejîyenê. Hukmat derheqê nê meseleyan de çîyêk nêkeno  la hukmî goreyê menfaatê xo şuxulneno. Nê paketê hukmî hewcadîya şarî werte ra wenêdareno. Sey tabloyêkê vengî yo. Ma nêzanê tede çi esto. Çike înan ma ra nêvat. Ma partîya girde ya hîrêne ya Tirîya yê, 6 mîlyon kesî ra rayî girewtî la nêwazenê ke ma ra qalêk bieşnawê.

Qanûnî Goreyê Îqtîdarî Yenê Rayraberdene

Heta ewro ma zaf bêqanûnîye dîyî la qerarê newe ra tepiştişê Demîrtaş û Yukdakdage nê hemeyan ra cîya yo. No tablo xo zaf eşkera ramojneno. Çike qewimîyayîşê 6-7’ê Teşrîna Verêne atmosferokê zaf cîya de ameyî cuwîyayene. Demê çareserîye de masayî ameyî qeldayene û nê qewimîyayîşî tim vera partîya ma ameyî şuxulnayene. Verî Erdogan Dermîrtaş û Yuksekdage sey mesludarê qewimîyayîşanê 6-7’ê Teşrîna Verêne ramotî û cade dima ra qerarê lezdayîşê cipersayîşî ame girewtene. No tesaduf nêyo.Tirkîya hinî dewletêka qanûnî nêya. Huqûq perspektîvêko hîna hîra yo herêmê mîyanneteweyîyî zî tede yê û tede hîna zaf azadîye esta. Mekanîzmaya ke nika esta goreyê Qenunê Bingeyênî yê derbeya 1980’î zî nêya. Rejîme yew merdimî de her qala ke fek ra vejîyena ferman a. Rojêk cuwa ver ferman dîya ewro her di hemserekî ameyî tepiştene. Nê semedî ra ma na paketê hukmî ra çîyêk nêpawenê û semedê welatêkê azad û biedaletî mucadeleyê xo rê dewam kenê.