Beyannameyê peynî yê Konferansê Cinîyan ê HDPyî

HDPyî beyannameyê peynî yê Konferansê Cinîyan ê 3. eşkera kerd.

Konferansê Cinîyan  bi şîara ''Ma azadîye de israr kenê û têkoşîn de qerardar ê'' 18-19ê çeleyî de bi tewrbîyayîşê 300 delegeyan Anqara de ame kerdene.

Beyannameyê peynî yê HDPyî wina yo:

"Ma şexsê Sakîne Cansiz, Fîdane Dogan, Leyla Şaylemez ê ke Parîs de ameyî qetilkerdene û şexê Sêvê Demîr, Fatma Uyar û Pakîze Nayir de selam danê pêro cinîyanê têkoşeran û bi rêzdarî înan yad kenê. Ma şexsê Gultene Kişanak û Sebahate Tuncel de zî selam danê pêro tepişteyanê cinîyan. Ma vera feqîrîye, teslîmîyetî, hêrişan, hukmkerdişan, asîmîlasyonî; welhasil vera pêro hêrişanê serê cinîyan vanê ke cinîye yena manaya cuye. 

Herêma ma binê şerî de ya. Konferansê ma eşkera kerd ke hêzê hegemonîkî û sermayeya globale seba cinîyan şîdet, qirkerdiş, serdestîya camêrdan, teda ra ber çîyêk nêwazenê. Aslê xo de çareserîya nînan bi modelê xo û şorişê xo yê cinîyan Rojawan a.Tirkîya de bêkarîya cinîyan, feqîrîya cinîyan û bêameyoxîya cinîyan bîyî zêde. Îqtîdaro ke seba cinîyan têna rolê dadîtîye û zewajî awan keno cinîyan pêro waranê berardişan ra tasfîye keno. Îqtîdar keno ke cinîyan binê hukm û hewcedarîya camêrdan de biciwîyê. Her cinîyêka ke xo kişena mesuldara ci dewlet a. Coka Meclîsê Cinîyan ê HDPyî îstîhdamê cinîyan, torra paştdayîşê cinîyan, keda cinîyan xo rê sey esas gênê.

Tirkîya şîdetê vera cinîyan de dinya de asta yewîne de ya. Rojêke çin a ke cinîyêke nêra qetilkerdene yan zî maruzê şîdetê cînsîyî bêra. Reyna endamê LGBT+î her roj yenê qetilkerdene. Îqtîdarê AKP-MHPyî bi cezanêkerdişê sucanê vera cinîyan keno ke nê sucî bizêdîyê. Ma canêardişê madeya 6284î, Peymana Îstanbulî, destsernayîşê heqê nafaka û qanûnê efûyî yê îstîsmarê domanan qebul nêkenê. Bi na wesîle ma soz danê ke ma do têkoşînê xo do dewam bikerê.

Kurdîstan de bi polîtîkayanê şerî yê taybetan cinîyê ciwanî yenê hedefkerdene. Bi nê polîtîkayan seba cinîyanê ciwanan warê cuye nêno veradayene û bi polîtîkaya qeyûman zî hemserekîye yena krîmînalîzekerdene. Sîstemê hemserekîya ke sîstemê îdareyê têdûştî yo xeta ma ya mor o. Ma do îdîaya xo ya bîyayîşê 'Partîya Cinîyan' ra gamêke zî apey nêerzê û ma do teşwîq bikerê ke no sîstem Rojhelatê Mîyanênî de û Tirkîya de bêro xebitnayene 

Birêz Ocalano ke  rayberîya têkoşîn û xoverdayîşê cinîyan kerde 21 serrî yo ke binê tecrîdêkê giranî de yo. Her çiqas no tecrîd bi xoverdayîşê Leyla Guven û dadîyanê laçiksipîyan amebi astengkerdene zî dima reyna îqtîdar tecrîd kerd falîyet.  Konferansê ma têkoşînê vera tecrîdî sey têkoşînê vera pederşahîye, yewperestîte û polîtîkayanê şîdetî hesibneno û armanc keno ke tecrîd bişikno.

Cinîyê ciwanî di rey hedefê îqtîdarî de yê. Coka îqtîdar qehirîyeno ke cinîyî nêzewijîyenê û armanc keno ke bi nasnameyanê bira, keke, babî û camêrdî  heqê ciwîyayîşê cinîyan xesp bikero.  Hetê bînî ra zî sey polîtîkaya îşxalê Kurdîstanî yeno kerdene ke cinîyî bibê ajan. Cinîyê ke naye qebul nêkenê yenê destbendkerdene û tepiştene.Ma sey meclîsê cinîyan qerardar û isrardar ê ke ma lîseyan de, zanîngehan de kargehan de zî meclîsanê cinîyan ronê ke nê polîtîkayanê îşxalî yê tayberan çin bikerê.

Her cayê dinya de cinîyî bi her tewirî û bi her ziwanî xo ver danê. Cinîyî bi şorişê Rojawanî xo awan kenê, bi dansê Las Tesîsî sere wedarenê û qîrenê vanê: 'Sucdar ti yî, tecawuzkar ti yî!' Ma do bi hawayêkê pratîkî bimojnê ke ma do Kurdîstan û Tirkîya de vera nê dormegirewtişan senî têkoşînê xo pîl bikerê. Ma vera ê kesanê ke wazenê têkoşînê ma yê birêxistine çin bikerê her roje îdîaya xo ya 'partîya cinîyan' pîl kenê û ma hêdî hêdî blokê camêrdan ê AKP-MHPyî qedînenê.

Ma her roje benê pîl, yenê pêser, Tirkîya, Kurdîstan û Rojhelatê Mîyanênî de torra enternasyonele ya cinîyan awan kenê la ê vera benê qij kêmîyenê û cîya benê. Ma reyna bi pêro qerardarîye û îdîaya xo anê ziwan: serra 2019î serra ma ya xoverdayîşî bîye, serra 2020î zî do biba serra ma ya serkewtişî."