Vervatoxê Cehdkerdişê 78an û Endamê Heyetê Rayberdişê Merkezî yê HDPyî Celalettîn Canî cewab da persanê ANFyî û tezkereyê şerî ercna.

Canî bale ante ser ke tezkere de binê nameyê 'gefê terorî' de çinkerdişê têgêrayîşê azadîye yê Kurdîstanî yeno hedefkerdene û vat: ''Tedeyîya tezkereyî de serdestîya erdî ya Iraqî û Başûrî yena binpaylerdene. Xora Tirkîya rew ra uca de baregehî û qereqolî virazena. Tezkere Sûrîye û Iraq de bîyayîşê artêşa tirke normalîze keno, meşrû keno û vano 'têkoşînê vera terorî.' Nê cayan de xoverdayîşêko zixm esto. Aye ra nika mumkîn nêaseno ke Tirkîya Surîye û Iraq de mende biba. ke Tezkere goreyê krîterê têkilîya hêzan nîyo. Bi tezkere îqtîdar wina hedef keno ke pê kaos û gefî mende bimano, qet nêbo masa de bimano.''

Canî vist vîrî ke Tirkîya semedo ke Rojawan de operasyonêkê neweyî bikera ganî verî Amerîka û Rûsya ra destûr bigêra la nika no zaf zehmet o. Canî vat: ''Ver bi Rojhelatê Firatî  Tirkîya sewqan kena. Artêşa tirke vera Kobanê hêrişê provakasyonî kena. Tirkîya wazena têkilîya Kobanê ya bi Cizîre biqerifna. Mi çimî de semedo ke mabênê QSD û Amerîka de têkilîye esta Amerîka do nêverda Tirkîya nê operasyonî bikera. Tirkîya Îdlîb de binê tehlkukeyî de ya la wazena Şehba, Til Rifat û Minbic de operasyon bikera.

Rûsya Sûrîye reyde têgêrena û semedê menfaatanê xo wazena serdestîya erdî ya Sûrîye bipawa. Amerîka zî QSDyî sey mutefîqê xo vînena. Goreyê xeberan Amerîka û Rûsya bi hawayêkê negatîfî nêzdîyê Tirkîya benê û derheqê meseleya Rûsya de pêkenê. Eke wina yo nêbeno ke semedê operasyonî destûr bidê Tirkîya.''