Ewropa de hêrişê dewleta tirke ameyî şermezarkerdene

Xeylêk şaristananê Ewropa de destsernayîşê şaredarîyanê HDPyî hetê cinîyan ra ame protestokerdene.

Helsinki

Helsinki de cinîyan bale ante şîdetê vera cinîyan ser. Çalakîye de hêrişê dewleta tirke yê vera rêxistinanê cinîyan ameyî şermezarkerdene. Çalakîye de pankartê bi nuşteyê ''Şîdetê vera cinîyan polîtîk o'' û ''Beno ke ti zî armanc bî'' ameyî akerdene. Dima çalakîya Zînî Wertê ameye kerdene. 

Kiel

Şaristanê Kielî yê Almanya de tecrîdê vera Rayberê Şarê Kurdî Abdullah Ocalanî, destsernayîşê şaredarîyanê HDPyî, hêrişê dewleta tirke yê vera goranê şehîdan, hêrişê vera HDPyî û ambargoyê Mexmûrî ameyî protetsokerdene.

Stuttgart

Şaristanê Stuttgartî yê Almanya de seba azadîya Rayberê Şarê Kurdî Abdullah Ocalanî çalakîyêke ameye kerdene. Çalakîye de ame parekerdene ke Rayberê Şarê Kurdî Abdullah Ocalanî 21 serran ra nata binê tecrîdî de yo û ganî şertê Zîndanê Îmraliyî bêrê weşkerdene.

Dusseldorf

Şaristanê Dusseldorfî yê Almanya de zî hêrişê AKP-MHPyî yê vera şarê kurdî ameyî protestokerdene. Çalakîye de sloganê ''Erdogan terorîst'', ''Erdogan dîktator'' û ''Tepişteyanê sîyasîyan rê azadîye'' ameyî vatene.

Stockholm

Şaristanê Stockholmî yê Swêdî de zî kurdistanijan dewleta tirke protesto kerd. Çalakîye de pankarta bi nuşteyê ''Dîktator Erdogan vîrusê Korona ra hîna bitehluke yo'' ameye akerdene. Çalakîye de flamayê Rayberê Şarê Kurdî Abdullah Ocalanî, alayê HDP û Têgêrayîşê Cinîyan ê Kurdan ameyî kiriştene.

Graz

Şaristanê Grazî yê Avusturya de zî destsernayîşê şaredarîyanê HDPyî û operasyonê qirkerdişê sîyasîyî yê vera kurdan ameyî protestokerdene.

Marsilya

Şaristanê Marsilya yê Fransa de zî destsernayîşê şaredarîyan û operasyonê qirkerdişê sîyasîyî ameyî protestokerdene. Çalakîye de vilawekî ameyî wendene, posterê Rayberê Şarê Kurdî Abdullah Ocalanî, alayê PKK, YPG, YPJ û TCŞyî ameyî berzkerdene.