Meclîsê Ciwanan ê HDPyî derheqê endamê xo Çekdar Aksucuyî de eşkerayîyêke daye ke Aksucu perey saetanê şewe de pê zorî ame nişnayene wesayîtê polîsan û ci rê ajanîye ameye kerdene.

Kombîyayîşo ke banê HDPyî yê Kayapinarê Amedî de amekerdene Wekîla HDPyî ya Amedî Dersime Dag û xeylêk endamê ciwanî tewrê ci bîyî.

Dage ard ziwan ke wextê peyênî de Amed de bi desan endamê înan ameyî remnayene û ci rê îşkence ame kerdene. Dage vat: ''Armanc teslîmgirewtişê ciwanan o. La ê do nêeşkê ciwanan teslîm bigêrê.''

Endamê Meclîsê Ciwanan ê HDPyî Yusuf Acarî zî pare kerd ke AKP-MHPyî vera ciwanan şer da destpêkerdene û vat: ''Şexsê tecrîdê vera Birêz Abdullah Ocalanî de wazenê şaran bivisnê binê kontrolê xo. Rewşêka winasêne de ciwanan rê polîtîkayê winasênî yenê kerdene. Nê metodî do pê ma nêeşkê.''

Acarî îfade kerd ke mîyanê 15 rojan de Amed de 6 embazê înan ameyî remnayene û îşkence dî. Acarî vat: ''Tewr peyên vizêr (perey) saete 12.00 de endamê ma Çekdar Aksucu wexto ke rêxistina Yenîşehîrî ra vejîya cigêrayîşê GBTyî ra dima pê zorî ame dekerdene wesayîtê Renault-Fluence, qasê nêm saetan rî bi rî maruzê hêrişê psîkolojîkî mend û ci rê ajanîye ameye ferzkerdene.''