Dêrsim de hêrişê cînsî yê hêzanê dewlete zêdîyene

Goreyê xebara ke medyaya sosyale de vila bîye Dêrsim de cinîyêke hetê 3 serçawuşanê pîsporan ra raştê hêrişê cînsî ameye. Seba ke na xebere vila bîye Mudirîya Weşîye ya Dêrsimî xebatkarê çapemenî yê ke derheqê babete de cigêrayîş kenê sey hedef ramojnayî.

Dêrsim de xeberê hêrişê cisnî yê vera domanan û cinîyan çend şino zêdîyene.  Hetêk ra  xeberê tecawuz û hêrişî  yê ke bi destê dewlete yenê kerdene zaf benê hetê bînî ra berpirsîyarê hukmatî yê bajarî yê ke wazenê tecawuzî binimnê îdîa  kenê ke Dêrsim bajaro tewr bihuzur ê welatî yo û êyê ke vera hêriş û tecawuzî vejîyenê û vejenê meydan înan sey sûcdarî ramojnenê.

Goreyê xeberanê peyênan yê ke medyaya sosyale de vila bîyî  Dêrsim de cinîyêke yewe aşme  verê cu hetê 3 serçawuşanê pîsporan ra raştê hêrişê cînsî ameye dima zî ameye kuwayene. Cinîya ke nameyê ci zelal nêbîyo goreyê zanayîşan  Xarpêt de ameye berdene nêweşxaneyêk. Bado zî Nêweşxaneyê Dewlete yê Dêrsimî de ameye tedawîkerdene. Yeno vatene ke seba ke no qewimîyayîş nêro eşnawitene nêweşxane de serê berê na cinîyêka qala ci yena kerdene de zîyrat qedexeyo ame nuştene. Seba ke na xebere çapemenîye de ca girewte Mudirîya Weşîye ya Dêrsimî  xebatkarê çapemenî yê ke derheqê babete de cigêrayîş kenê sey hedef ramojnayî û vat: ''Nê kesê ke nê xeberan vila kenê wazenê ke huzurê bajarî bixeripnê.''

Platformê Rojnamegeran ê Cinîyan ê Mezopotamya derheqê babete eşkerayîyêke daye û vat rojanamegerî karê xo kenê û bi cigêrayîşanê xo rayapêroyî hayîdar kenê. Eşkerayîye de îstîsmarê Pêrtaqî û vînîbîyayîşê Gulîstane Doku zî ame vîrardene û ame vatene ke seba ke serê qewimîyayîşan bêro girewtene rojnamegerî sey hedef yenê ramojnayene. No zî vera azadîya îfadeyî û viraştiş û girewtişê xeberan derbeyêk o. Coka Mudirîya Weşîye ya Dêrsimî ganî eşkerayîya xo cade peyser bianeco û rojnamegeran ra ozre xo biwazo.

Hetê bînî ra Baroyê Dêrsimî zî muracatê Serdozgerîya Komare kerd ke wa derheqê 3 serçawuşanê pîsporan ê ke hêrişo cînsî û fîzîkî vera  cinîyêke kerd de cipersayîş bêro destpêkerdene.