Dêrsim de Seyîd Riza û hemrayê ey amey vîrardene

Seyîd Riza û hemrayê ey serrgêra 82. e darderkerdişê înan de Dêrsim de amey vîrardene. 

Hêzê Ked û Demokrasî yê Dêrsimî, Seyîd Riza û hemrayê eyê ke 15ê teşrîna peyêne 1938î de ameybî dardekerdene  bi çalakîyêk ardî vîrî. 

Vîrardişo ke Meydanê Seyîd Rizayî de ame kerdene de temsilkarê partîyan û sazgehanê sîyasîyan, organîzasyonê komelê sîvîlî, komaleyê elewîyan, pîr û dayîkîkî, hemşaredar Fatîh Mehmet Maçoglu, hemşarêdarê Akpazarî Orhan Çelebî û Songule Dogan ê ke cayê înan de qeyum ameybî tayînkerdene, parlementerê HDPyî yê Dîyarbekirî Musa Farisogullari û gelek  kesê bînî amede bîy.

Meydanî de temsilkarê Fedarasyonê Komelayanê Dêrsimî Kenan Yîgîtî beyanatêko hempar da. Yîgîtî ard ziwan ke dardekerdişê Seyîd Rizayî û hemrayênê ey ra dima qirkerdiş kewto dewre û va: “Cenazaya Seyîd Rizayî seba ke şarî ser o tesîr meka ameya veşnayene. Ê ke mendî kerdî koçber.” Yîgîtî waşt ke ganî arşîvî bêrê akerdene, Nameyê Dêrsimî apeyde bêro dayene, şarê Dêrsimî ra ef bêro waştene, lîsta kesê ke ameyê surginkerdene, vîndîbîyê û yan zî demo ke doman bîyê dayîyê kesanê bînan bêra eşkerakerdene. Reyna gora Seyîd Riza û hemrayanê ey  bêra eşkerakerdene. Ziwan û azadîya bawerî ya Elewî-Qizilbalşan bêra naskerdene, projeyê bendawe Munzurî bêro vindarnayene.” 

Dima ra parlementerê Dîyarbekirî Musa Farisogullari qisey kerd û vat: “Senî ke 82 serrî naye ra ver Seyîd Risza û hemrayê ey amey qetilkerdene nika zî eynî polîtîka êna kerdene. Wa her kes naye bizano ke qeyumê ke ame tayînkerdene tena seba awanîye. Tewr kes nêşkeno îradeyê şarê ma bişikno. Şarê ma xoverdayîşê xo dewam keno û do dewam bikero.” Dima qiseykerdişan vîrardiş bi ronayîşê qerenfîlan û verê heykelê Seyîd Rizayî de tafîştişê çirayan rest peynîye.