Hemsereka KCDyî û Wekîla HDPyî ya Colemêrgî Leyla Guvena ke hetê îqtîdarî ra dest nîya wekilîya ci ser, serekanê Parlamentoya Ewropa û Komîsyonê Ewropa, Temsîlkarê Berzî yê Polîtîkaya Teberî yê Yewîya Ewropa û xeylêk lîderanê sîyasîyan ê Ewropa rê mektubêk erşawit. Mektub de bale ameye teda û zorbazîye ser ke wextanê peyênan de zêdîyayî.

Guvene vat: ''Îqtîdaro sîyasî yê Tirkîya her ke şino otorîter beno, pê krîmînalîzekerdişê KCDyî û mudaxeleyê warê sîyasîyî zerar dano têkilîyanê mabênê Tirkîya û Ewropa.''

Mektub Serekê Parlamentoya Ewropa David Sassoli, Serekê Komîsyonê Ewropa Irsula von der Leyen, Temsîlkarê Berzî yê Yewîya Ewropa Josep Borrel, Sekreterê Pêroyî yê Konseya Ewropa Marija Buric, Serekê Meclîsê Parlamaneteran ê Konseya Ewropa Rik Deams, Serekanê Komanê Meclîsê Parlamenteran ê Konseya Ewropa, lîderanê Komanê Parlamentoya Ewrpa, Konseya Ewropa, Temsîlkaranê Heqanê Merdiman ê Neteweyan ê Yewbîyayeyan, Yewîya Mabênê Parlamentoyan û temsîlkaranê dezgehanê Ewropa rê ame erşawitene.