Hamburg de Festîvala Fîlman a Kurdan

Hamburg de 31ê Teşrîna verêne de Festîvala Fîlman a Kurdan do dest pê bikero û heta 4ê Teşrîna peyêne dewam bikero.

Serra 2015î ra nata her serre Hamburg de Festîvala Fîlman a Kurdan yena viraştene.

Programê  emserî reyna sey her serrî zaf zengîn o û festîvala emserî rejîsor û rojnameger Mehmet Aksoyo ke par aşma Êlule de wexto ke çapemenîya YPGyî de xebitêyayene Reqa de cuya xo vînî kerde, ey rê ameye xelatkerdene.

Fîlmo kilm ’Panfîlo‘ ê Aksoyî zî do sînemaya Studîoyî ya Hamburgî de, akerdişê galaya fîlman de bêro ramojnayene. Bado zî fîlmê  bi nameyê ''Girls of the Sun'' ( Keynayê Tîje) ke babeta xoverdayîşo tarîxî yê cinîyan ê kurdan ke vera çeteyanê DAÎŞî  dabi gena dest, do bêro ramojnayene.

Fîlmo ke rejîsorîya ci Eva Hussone kerde Festîvala Fîlman a Cannesî de amebi ramojnayene û bi silogananê ‘‘Cinî, Cuye, Azadîye‘‘ amebi çepikkerdene.

Fîlmê ‘‘Colorless Dream‘‘ (Hewno Bêveng) û "Well"(Bîr) zî tede xeylî fîlm û dokumanterê bînî zî do heta 4ê Teşrîna  peyêne sînemayê  3001î  de bêrî ramojnayene.