Hamburg, Marsîlya, Bordeaux û Mîlano de Newroze amî pîrozkerdene

Şaristanê Hamburgî yê Almanya de, Marsîlya û Bordeaux ê Fransa de û Mîlano yê Îtalya de pîrozkerdişê girseyîyî yê Newroze ameyî viraştene.

Şaristanê Hamburgî yê Almanya de Newroze bi coşêkê pîlî ame pîrozkerdene.

Pîrozkerdişo ke di hezar kesî tewrê ci bîyî salona pîrozkerdişî bi posteranê şehîdan û posteranê YPG, YPJ û Rayberê Şarê Kurdî Abdullah Ocalanî ameye pirkerdene.

Pîrozkerdişo ke bi rêzgirewtişî dest pêkerd de hemsereko verên ê HDP’yî yê Elezîzî Selahattîn Bîlîmî qiseykerdişêk kerd.

Bîlîmî ard ziwan ke Newroza ke yena pîrozkerdene kesanê ke şehîd bîyê înan rê ameya îtxafkerdene û vat, “Hemverê Dehaqanê zaliman de do Kawayî tim xo ver bidê.”

Şewa ke bi ramotişê sînevîzyonî dewam kerde Xelîl Xemgîn, Bulent Tûran, Şengul Pake û Grûba Folklorî ya Govenda Sîpan Amara sehne de ca girewt.

Pîrozkerdişî de seba çalakîya ke do meşte verê CPT’yî de dest pê bikero û heta 29’ê Adare dewam bikero zî seba tewrbîyayîşê ci vengdayîş ame kerdene.

MARSÎLYA

Kurdistanijê ke Başûrê Fransa de ciwîyenê Newroza emserî Marsîlya de bi şîarê ‘Ma tecrîdê Îmraliyî bişiknê, Ocalanî azad bikerê’ pîroz kerde. Newroza ke salona govende ya Paşayî de ameye viraştene hezar ra vêşêr kesî tewrî ci bîyî.

Peyê sehneyî de xeylî ziwanan de posterê “Ocalanî rê azadî,” “Biciwîyo Newroze” û “Bi ruhê qesasê şehîdan, sere wedare” ameyî daliqnayene, fotografê gerîlayanê ke şehîd kewtê ameyî kiriştene û çar dorê salone rê beyraqê PKK, KCK, YPG/YPJ’yî ameyî daliqnayene.

Pîrozkerdişê Newroze bi rêzgirewtişê seba Zehra Saglame, Zulkuf Gezen û Ayten Beçete ke semedê protestokerdişê tecrîdê girankerdeyî yê serê Rayberê Şarê Kurdî Abdullah Ocalanî çalakîya fedaîye viraştebî dest pêkerd.

Dimayê rêzgirewtişî ra bi nameyê Komîteya Tertîbî Fethî Korûkçûyî qiseykerdişêk kerd. Korûkçûyî veng da heme Kurdistanijan ke bi ruhê serewedartişî prosesî rê wayîr vejîyê.

Sîyasetmedaro Kurd Xebat Ocalano ke dimayê Korûkçûyî ra qisey kerd vat “bedelê ci çi beno wa bibo ma do tecrîdê serê Rayber Apoyî bişiknê.”

Meclîsê Cinîyan ê Arîn Mîrkane û Têgêrayîşê Ciwanîye yê Marsîlya şewe rê peyamêk şirawit.

Heman wextî de peyamo bidîmen ê hemserekê Konseya Rayberdişî ya KCK'yî Cemîl Bayikî ame temaşekerdene.

Şewe de Hozan Menale, Alî Agirê Jîyan, Rojda Bîtere û Hozan Arhatî sehne de ca girewt.

Pîrozkerdişê Newroze bi sloganan qedîya.

BORDEAUX

Bi seyan kesî tewrê pîrozkerdişê Newroze yê Bordeauxî bîyî.

Newroza ke bi rêzgirewtişê seba şehîdanê şorişî dest pêkerde de Koma Stêrk, Kendal Manîş, Denîz Demane û Çetîn Zîlanî sehne de ca girewt.

Birayê Zehra Saglame ya ke hemverê tecrîdî de Zîndanê Tîpê T’yî yê Girewteyî yê Oltî de çalakîya fedaîye viraştebî mektûba ke hetê aye ra ci rê amîbî şirawitene wende.

Qiseykerdişanê pîrozkerdişî de bale ancîyaye xoverdayîşê şarê Kurdî, hêrişanê dewleta Tirkî û çalakîyanê grevê vêşanîye ser.

Pîrozkerdişî de tecrîdê serê Ocalanî ame şermezarkerdene, adirê Newroze ame wekerdene û govende amî kerdene.

MÎLANO

Şaristanê Mîlano yê Îtalya de bi tewrbîyayîşê Kurdistanij û Îtalyayijan Newroze amî pîrozkerdene. Pîrozkerdişo ke bi rêzgirewtişî dest pêkerd de qiseykerdişan de proseso pêroyî ame ercnayene. Qiseykerdişan de bale ancîyaye serê xoverdayîşê grevê vêşanîye û ame vatene ke no xoverdayîş zor dano Erdogan û îqtîdarê ê.

Ame vatene ke do şexsê şerwano enternasyonalîst Tekoşer Pilingî yo ke Rojawan de şerê hemverê DAÎŞ’î de şehîd kewtibi vîrameyîşê şehîdan rê wayîr bêro vetene.

Profesorê Unîversîteya Katolîke Paolo Branco ard ziwan ke ê zerrî ra paştî danê mucadeleyê Kurdan ê hemverê DAÎŞ’î û vat mucadeleyê azadîye yê Kurdan mucadeleyê anorî yo.

Dimayê ramotişê sînevîzyonî ra Koma Çarnewa sehne de ca girewt û pîrozkerdiş qedîya.