HDP 20ê Teşrîna verêne de bi viraştişê „Komxebata Îdarekarîyê Cayîyî“ dest bi xebatanê weçînitişanê cayîyan bikero. Komxebate de do polîtîkayanê îşxalkaran yê qeyûman û tehdîtanê Erdoganî ser o zî bêro vindertene.
Xebera Mayî ra gore Partîya Şaran a Demokratîke (HDP) 20ê Teşrîna verêne de do Amed de „Komxebata Îdarekarîyê Cayîyî“ virazo. Yeno pawitene ke kîşta hemserekanê HDPyî Pervîn Buldan û Sezaî Temelî de sîyasetkaro kurd Ahmet Turk, hem vervatoxê Kongreya Demokratîke ya Şaran (HDK), hemserekê Kongreya Komela Demokratîke (KCD) Berdan Ozturk, aktîvîstê Têgêrayîşê Cinîyanê Azadan (TJA) a pîya pabesteyê HDPyî û îtîfaqî tewrê ci bibê.
6 RONIŞTIŞÎ YENÊ PLANKERDENE
Komxebata ke yeno plankerdene bi 6 roniştişan bêro viraştene, aye de do babetê sey „Sîstemê Cênîyan yê Îdarekarîya Cayîye“ û „Modelê Îdarekarîya Cayîye yo Demokratîk û Verşeklê Polîtîkayan“ bêrê munaqeşekerdene.
POLÎTÎKAYÊ ÎŞXALKARÎ DO BÊRÊ MUNAQEŞEKERDENE
Babetêka bîne ya ke do bêro munaqeşekerdene zî polîtîkayê AKPyî yê hemverê şaredarîyanê BDPyî û polîtîkayê îşxalkarî yê qeyûman ê. Hetêna ra tehdîtê serekkomarê tirkî Tayîp Erdoganî yê „ma do qeyûm tayîn bikerê“ zî mîyanê meselayanê ke do bêrê munaqeşekerdene de yê.
TECRUBEYÊ ŞAREDARÎKARÎYE DO BÊRÊ NEQLKERDENE
Rojdemêko bîn ê komxebate yo muhîm zî HDPyî rê neqlkerdişê tecrubeyê sîyasetê kurdan yê 20 serrî yê ke bi polîtîkaya „Ma do xo zî şaristanê xo zî îdare bikerê“ ameyêne bicaardene yo.
DO BI KOMXEBATE DEST PÊ BÊRO KERDENE
HDP do bi na komxebata xo xebatanê weçînitişê cayîyî yê aşma Adare ya serra 2019î bido. Bi zanayîşo ke qulîsanê HDPyî ra ame girewtene bajaranê pîlan de do namzedanê ke eşkenê CHP û AKPyî ra zî reye bigîrê ser o yeno vindertene.
