Komîsyonê Têkilîyanê Teberî yê HDPyî 3 mektubê cîyayî dezgehanê mîyanneteweyîyan, sersefirî û partîyan rê erşawitî.

Mektuban de qala hêrişanê dewleta tirke, îşkenceyê vera Rojbîne Çetîn, qefilnayîşê bînaya KCDyî, şert û mercê Denîz Yildirim û tepişteyanê neweşan ameye kerdene. Mektub pê îmzaya Hemvervatoxanê Komîsyonî Feleknas Uca û Hîşyar Ozsoyî ame erşawitene û derheqê hêrişanê îşxalî de ame vatene ke nê hêrişî heman wextî de warê hewayî yê welatan ê cîranan bin pay kenê. Mektub de ame îfadekerdene ke hêriş, teda, zorbazîya vera kurdan û Kurdîstanî sey rewşêka normale yenê dîyene.

Mektub de rewşa lezabezî ya tepişteyan ê nêweşan zî ameye vîrvistene û venga Komîteya Vergirewtişê Îşkenceyî (CPTİ), Konseya Ewropa, Meclîsê Parlamenteran ê Konseya Ewropa û Komîserîya Berze ya Heqanê Merdiman a Neteweyanê Yewbîyayeyan ame dayene ke seba pawitişê heqê weşîye yê tepişteyanê  nêweşan têbigêrê.