Herînayîş û rotişê seba roşanî qels derbaz benê

Kesê ke seba Roşanê Qurbanî çîyan rotenê û herînenê îfade kene ke krîzê ekonomîkî xeylêk tesîrê bazarî kerd.

Roniştoxê Îstanbulî anê ziwan ke krîzê ekonomîkî zaf tesîrê bazaran kerd û ê nêeşkenê ke seba Roşanê Qurbanî çîyêk bihêrînê yan zî biroşê.Bazarê Cinîyan ê Fatîhî yê Îstanbulî de ke sey bazarê kurdan şinasîyeno esnaf zî muşterîyî zî gerreyê vayan kenê. Bazarê Cinîyan ê Fatîhî de bi taybetî berhemê Kurdîstanî roşîyenê.

Esnafê 17 serran ê sêrtijî vat: ''No roşan ê bînan ra zehmetêr derbaz beno. Korona zaf tesîrê ma kerd.''
Bekîr Alayî zî 20 serran ra nata roşan de şeker roşeno. Alayî vat: ''Hemwelatîyî Korona ra tersenê. Ma zî tersenê. Pêro karê ma vindertî. Verê cû ma pê tonan şekerî rotêne la nika ma wina nêeşkenê.''

Esnafê bînî yo ke koçeran ra pendîr gêno û roşeno vat: ''Rewşa Tirkîya werte de ya. Ma ekonomî ra qels bîyî. Roşananê verênan de ma venga xalzayanê xo dayêne ke bêrê ma rê hetkarî bikerê. Nika mi lajê xo ra vat wa şoro keye. Çunke kes nêno.''

Ayşe Eren zî kênayanê xo reyde ameye bazar ke seba roşanî çîyêk bihêrîna. Ayşe vat: ''Mi nêm kîlo şekir hêrîna. O zî seba ma yo. Ma maeşê xo zî nêgirewtî. Têna vatişan de bazarê roşanî esto.''