KCK: Qerarê Amerîka leteyê komploya mîyanneteweyîye yo

Hemserekîya Konseya Rayberdişî ya KCKyî qerarê Amerîka sey leteyê komploya mîyanneteweyîye hesibna û şarê kurdî û hetanê demokratan ra waşt ke vera nê qerarî wirzê lingan ser.

Hemserekîya Konseya Rayberdişî ya KCKyî: Qerarê bêbingeyî yê Amerîka leteyê komploya mîyanneteweyîye ya vera Rayber Apoyî yo. Ganî şarê kurdî û hetê demokratî hemverê nê qerarî de wirzê lingan ser.

Hemserekîya Konseya Rayberdişî ya KCKyî bi eşkerayîyêk cewab da qerarê tepiştişê Hemserekê Konseya Rayberdişî yê KCKyî Cemîl Bayik, Endamê Komîteya Rayberdişî yê PKKyî Duran Kalkan û Murat Karayilanî yê Amerîka. 

Eşkerayîya KCKyî ra  tayî cayî wina yê:

‘‘Amerîka derheqê ronayoxanê PKKyî û kadroyanê rayberan ê Têgêrayîşê Azadîye yê Kurdan ra Cemîl Bayik, Duran Kalkan û Murat Karayilano ke îdareyê PKK, KCK û HPGyî de ca gênî qerarêko bêbinge girewt û semedê gerrekerdişê înan xelat eşkera kerdo. Vera têgêrayîşê ma nê hawayê ewnîyayîşî yê dişmenî û no qerar bîlasebeb o. Hetê sîyasî, komelkî, ehleqî, wijdan û huqûqî ra qet yew sebebê ney çîn o. No qerarêko îdeolojîk û polîtîk o. No qerar tena vera PKK, KCK û HPGyî nê heme kurdê ke mucadeleyê azadîye û demokrasî danê pêroyê înan rê hêriş o.

QERAR DEWAMÊ KOMPLO YO

Bêşik o ke dewletê ke hêrişê qirkerdişî  hemverê Rayber Apo, PKK û Têgêrayîşê Azadîye yê Kurdan de kenî, komploya  ke 9ê Teşrîna verên a 1998î de ameye destpêkerdene û 15ê Sibat a 1999î de  zîndanê Îmralî de bi esaretî qedîyaye, bi nê qerarî heman çî yeno waştene. Nê qerarê bêbingeyî yê  Amerîka leteyê komploya mîyanneteweyîye yê vera Rayber Apoyî yo. Komploya 1999î bi felsefeya girde ya Raber Apoyî û mucadaleyê PKKyî zafê ci pûç ame vetene.

Wextê qerarî zî manîdar o. Felsefeya netewa demokratîke ya Rayber Apoyî vila bena û kiştê naye de sendîkageranê Îngilîstanî kampanyaya ‘‘Ma tecrîdî bişiknê, faşîzmî birijnê û Kurdîstan azad bikerê‘‘ daya destpêkerdene û  heme dinya de hetanê demokratan paşt dayo ci. Bi nê qerarî yeno waştene ke vernîya naye bigerîyo. No vera şarê kurdî hêrişêko bêehleq o. 40 serranê peyênan de PKKyî averşîyayîşê Kurdîstanî  ser o tesîro gird kerd.

PKKYÎ HEMVERÊ DAÎŞÎ DE XOVERDAYÎŞO XURT DA

Nê serranê peyênan de DAÎŞo ke sereyê dinya rê bîyo bela, vera nê çeteyan de reyna PKK estbî. Şengal de Êzidîyî qirkerdiş ra xelisnayî. Dekewtişê çeteyan ê Hewlerî zî gerîlayanê HPG û YJA-STARî vindarna. Kerkuk û Silêmanîye de gerîlayanê HPG û YJA-STARî bi peşmergeyan vernîya hêrişê çeteyan girewte. Xoverdayîşê Kobanê de zî gerîlayê HPG û YJA-STARî cayê şerwananê YPG û YPJyî de bî. Heme dinya zana ke şerwanê YPG û YPJyî ke xeta Rayber Apoyî de şer kenî qesranê Fransa de, temsîlkarê Şorişê Rojawanî heyeta têkilîya teberî ya Amerîka de ameyî qebulkerdene. Xora paştgêrîya Erdogan û AKPyî yê DAÎŞî zî eşkera yeno zanayene. Nika no qerarê Amerîka Erdogan û AKPyî rê paştdayîş o. Ê ke vera DAÎŞî mucadele kenê yeno waştene ke bêrî tasfîyekerdene û xelat dîyena hemparanê ci.

ŞARÊ MA Û HETÊ DEMOKRASÎ GANÎ WIRZÊ LINGAN SER

Heme şarê dinya û hetê demokrasî zanê ke Rayber Apo rayberê xeta azadîya cinîyan o, PKK rayberê mucadeleyê azadîye yo, HPG zî hêzê gerîla yê şarê kurdî yo.  Amerîka goreyê karê xo no qerar  girewto û bîya hemparê sucê qirkerdoxan. No qerar ewro hetê şaran ra siba zî hetê tarîxî ra do bêro muhakemekerdene. Nê rojanê ke azadîya Rayber Apoyî yena waştene û gurenayîşê PKKyî lîsteyê terorî yê Ewropa ra vetişî yenê kerdene hêrişê serê hemrayanê ma Duran Kalkan, Cemîl Bayik û Murat Karayilanî nênê qebûlkerdene. Ganî şarê ma û hetê demokrasî vera naye wirzê lingan ser.