Komeleya Edebîyatkaranê Kurdan ameye ronayene

Amed de seba ke têkilîya mabênê edebîyatkaran baş bêra kerdene û ziwan û edebîyat bêrê averberdene Komeleya Edebîyatkaranê Kurdan ameye ronayene.

Amed de grubêka nuştoxan seba ke paştdayîşê yewbînan xurt bikera û ziwan û kultur aver bêra Komeleya Edebîyatkaranê Kurdan ronaye. Muracatê seba roneyîşê komele hetê Walîtîya Amedî ra zî ame tesdîqkerdene. Komele armanc kena ke paştdayîşê nuştoxanê kurdan rêxistin bikera. Hemserekîyê komele zî Sultan Yaray û Hogir Berbir ê.

Hemsereka komele Sultane Yaray îfade kerd ke seba ke Komeleya Nuştoxanê Kurdan ameye girewtene înan hewce dî ke Komeleya Edebîyatkaranê Kurdan saz bikerê. Yaraye da zanayene ke komele hedef kena ke bi kirmanckî, kurmanckî û sorankî xebatan bikerê û panel, semîner, konferans û kargehan zî serûber bikerê. Yaraye ard ziwan ke komele do bikera ke meseleyanê nuştoxan çare bikerê û kitabanê neweyan bida şinasnayene.