Camêrdê bi nameyê B.K.yî çeleyê 2020î de Antalya de tecawuzê domanêka 16 serre N.D. kerdbi. Gerreyî ra dima B.K. bi sûcdarîya 'îstîsmarê domane' û 'astengkerdişê heqî' amebi tepiştene. Roniştişê 3. yê dewa Mehkemeya Cezaya Girane ya Antalya de ame dîyene. 

Domana 16 serre N.D., avûkatê ci, avûkatê versûcî û tay şahîdî beşdarê mehkeme bîyî. Versûc B.K. zî bi rayîrê SEGBÎSî tewrê mehkeme bi. Avûkatê versûcî da beraat waşt. Avûkatanê N.D. zî pawitişê xo kerd û da zanayene ke raporê nêweşxaneyî de tecawuz ameyo eşkerakerdene.

Dozgerî waşt ke tepiştişê versûcî dewam bikero la heyetê mehkeme bi îdîaya 'delîlanê kêman' bire daye ke versûc wa bêro veradayene. Roniştiş ame taloqkerdene.

Avûkata N.D. vera bira mehkeme nêrazîbîyayîşê xo mojna û vat: ''Na bire huqûqî nîya. Dosya de delîlê ke nêameyê komkerdene estê. Beno ke versûc delîlan werte ra wedaro. Coka ganî sey tepişte bêro hukmkerdene. Ez fam nêkena ke senî dadgerêka xanime wina yew bire dana. Sûcê tecawuzî eşkera yo.''