Rixmê hêrişanê dewleta tirke zî hûmara şingalijanê ke agêrenê wareyanê xo zêdîyena. Îdareyê Xoserê Demokratîkî yê Şingalî seba pêşwazîkerdişê koçberan 15ê gulana 2020î de komîsyonêk amade kerd. Komîsyonî derheqê xebata xo ya hezîrane de eşkerayîyêke weşanaye. Komîsyon seba ke asayîşê înan bîyaro ca şingalijan pêşwazî keno, seba agêrayîşê înan şert û mercan aferneno.

Eşkerayîye de ame vatene ke keyeyê tay şingalijan rijîyayî û tay herêmanê Şingalî de zî binwanîya awe û ceyranî şerî ra texrîb bîye û Îdareyo Xoser xîret keno ke xizmet biresno nê herêman.

Komîsyon pê wesayîtan şingalijan beno wareyanê înan, keyeyê înan pak keno û şingalijan keyeyanê ci de ca keno.

Goreyê eşkerayîya komîsyonî mengêke de 913 şingalijî kampanê Başûrê Kurdîstanî ra agêrayî dew û qezayanê Şingalî û no agêrayîş do dewam bikero. Komîsyonî venga şingalijan da ke abigêrê Şingal û wayîrê Şingalî bivejîyê.