Îstanbul de Meydanê Yenîkapi de pê şîarê 'Pê adirê Newroze xo ver bidê, azad bibê' Newroze dîyaye destpêkerdene. Bi se hezaran kesî tewrê şayîya Newroze bîyî. Şayîye de girseyan tecrîdê vera Rayberê Şarê Kurdî Abdullah Ocalanî û xîretê seba qefilnayîşê HDPyî protesto kerdî.

Cinîyî pê erbane û tîlîlîyan, ciwanî zî pê Marşê Rojawanî û deyîranê kurdkî ver bi warê Newroze şîyî. Warê şayîye de polîsî 3 noqtayan de girseyan vindarnenê.

Kortejê HDPyî bale ante grevê vêşanîye yê tepişteyan ser ke 114 rojî yo dewam keno û sloganê sey 'Biciwîyo xoverdayîşê zîndanan' vatî. Cinîyê HDPyî zî pê sloganê 'Heq, huqûq û edalet do pa HDPyî bêrê' dekewtî warê şayîye. Kortejî pê sloganê 'Destê xo mede îradeyê ma' vera dewaya qefilnayîşî nêrazîbîyayîşê xo mojna.

Şayîye pê deqayêkê rêzgirewtişî dest pêkerde û dima Marşê Çerxa Şoreşê ame wendene. Komîteya Amadekarîya Newroze selam da girseyan û Serekê Komîte Murat Kalmazî qisey kerd.

Nameyê Platformê Hêzanê Demokrasî, Haştîye û Kede yê Îstanbulî ser o Zeynepe Çelîk metnê hemparî yê eşkerayîya çapemenîye wend û pare kerd ke pê betalkerdişê wekilîya Omer Faruk Gergerlîogluyî û dewaya qefilnayîşî vera demokrasî derbêka pîle ameye kerdene.Zeynepe eşkera kerd ke pê nê kerdişan huqûq û qanûnê bingeyî ameyî binpaykerdene û vat: ''Ma sey hêzanê edalet, têdûştî û demokrasî vera nê hêrişan ê faşîstan milê xo çewt nêkerê. Vera îqtîdarî hêzê ma yo tewr pîl xoverdayîş o. Seba ke polîtîkayê îqtîdarî biqedê, meseleya kurdan çareser biba ganî ma pê xoverdayîş û têkoşînî kelaya demokrasî berz bikerê. Faşîzm do birejo, şarê xoverdayoxî do ser bikewê. Gergerlîoglu û HDP têna nîyê. Newroz fîraz bo!''

Çelîke peynîya qiseykerdişê xo de vera wedaritişê Peymana Îstanbulî nêrazîbîyayîşê xo mojna û venga pêro cinîyan da ke 17.00 de Kadikoy de Îskeleyê Beşîktaş-Kadikoyî de wayîrê Peymana Îstanbulî vejîyê.