Çalakîya nobete ya 'Seba Rayberê Şarê Kurdî Abdullah Ocalanî Azadîye' ya ke verê bînaya Konseya Ewropa de şaristanê Strasbourgî yê Fransa de yena kerdene hewteyê 392. de ya.

Hewa çend serd bo zî kurdîstanijî her hewte seba azadîya Ocalanî serê sibayî ra heta şanî verê bînaya Konseya Ewropa de nobete de yê. Nobetdarê nê hewteyî 5 cinîyê Komîteya Komelkî ya Têgêrayîşê Cinîyan ê Kurdan ê Ewropa (TJK-E) yê. Eşkerayîya kome de ame parekerdene ke ê do qet esaretê Ocalanî qebul nêkê û venga Konseya Ewropa û CPT da ke xo bêveng, ker û lal nêkera.

Kome vist vîrî ke hewt serrî û nîme yê ke kurdî verê bînaya Konseya Ewropa de seba Ocalanî nobete de yê û na çalakîya înan bi qerardarîye do dewam bikê. Çalakîkeran vat ke dewleta tirke nê wextî de kurdan qir kena, tecrîdê Ocalanî giran kena.

Eşkerayîye de venga merdimîye ame kerdene ke babeta azadîya Ocalanî de baldar biba û ame vatene ke Ocalan pawitoxê demokrasîyî û haştîye yo û ganî her kes biko ke sîyaseto gemarin ê vera Rayberê kurdan bêro vindertene.

Çalakîkeran vera Konseya Ewropa û Komîteya Vergirewtişê Îşkenceyî (CPT) nêrazîbîyayîşê xo mojna û wina vat: "Ma nê dezgehan rê vanê ke şima do heta çi wextî xo ker, lal û kor bikê? Sebrê ma nêmend."

Nobeta ''Seba Ocalanî Azadîye'' 25ê hezîrana 2020î ra nata bêmabên dewam kena. Her hewte komêka kurdîstanijan û dostanê înan ê ke şaristananê cîyayan ê Ewropa ra yê tewrê çalakîye benê. Endamê TJK-E zî tewr tay mengêke de yew tewrê çalakîye benê.