Menga hezîrane de Komîsyonê Têkilîyanê Teberî yê Parlamentoyê Belçîka vernîyazê serê şinasnayîşê Qirkerdişê Êzidîyan qebul kerdbi. Parlemantoyê Belçîka zî vernîyaz tesdîq kerd. Vernîyaz 14ê temmuze de kewt rojdemê Meclîsê Temsîlkaran ê Belçîka. Nîqaşan ra dima şewa 15ê temmuze raye dîyaye vernîyazî. 

Vernîyaz rayberîya Wekîl Georges Dallemagneyî de hetê Koen Metsu, François De Smet, Malik Ben Achour, Michel De Maegd et Samuel Cogolati, Mmes Els Van Hoof, Goedele Liekens et Vicky Reynaert û Wouter De Vriendtî ra ame pêşkêşkerdene.

Pêşnîyaz pê pêro destekê koman ame qebulkerdene. Raydayîşî ra verî Wekîl Koen Metsuyî ANFyî rê qisey kerd û vat: ''Wa her kes raya xo bido. Ma ser kewenê.''

Xirîstîyananê Demokratan ra Georges Dallemagne bale ante ser ke serrgêra qirkerdişî ra verî raydayîş zaf girîng o û vat: ''Vera nê komelî sûcêko pîl ame kerdene. Ganî sey pêro komelan komelê êzidîyan zî kokê xo ser o biciwîyê.''

Partîya Xoza ra Ecolo Samuel Cogolatiyî vat: ''Ma seba muhakemekerdişê sûcdaranê nê qirkerdişî zî ganî her çîyî bikerê. Têna pê şinasnayîşî nêbeno.'' Partîya Sosyalîste ra Chrîstophe Lacroîx îfade kerd ke şinasnayîşê nê qirkerdişî asta sembolîke û sîyasî de girîng o.

Vernîyaz de bale ameye antene nê xusûsan ser: ''Serra 2014î ra nata DAÎŞî sere de vera êzidîyan vera asûrî, sûryanî, keldanî, şebek, timen, kurd, elewî, misilmanê sûnî kerdî hedef. Nê hêrişan bi taybetî êzidîyî ameyî hedefkerdene, maruzê tedaya sîstematîke mendî, ameyî rotene, kolekerdene, vêşnayene, misilmankerdene. Baxçe û warê zîretî yê êzidîyan ameyî talankerdene û vêşnayene.''

Waştişê ke hukmatî ra ameyî kerdene nê yê:

1-Pêro hukm û krîterê qanûnî yê zereyî û mîyanneteweyî bişuxilîyê ke jenosîdê DAÎŞî yê vera êzidîyan bêceza nêmano.

2-Semedo ke sûcdarê qirkerdişî bêrê muhamekerdene ganî xîretê mehkemeya Belçîka bêrê teşqîkerdene û destekdayene

3- Semedo ke êzidîyî abigêrê waranê xo bi taybetî bêro waştene ke peymana mabênê Iraq û Başûrê Kurdîstanî bêra caardene û caardişê na peymane bêro çimdarîkerdene.

4-Semedo ke şaristan û dewê rijîyayeyî newe ra virazîyê paştî bêra dayene.

5- Mexdûrê  şîdetê cînsî, kesê ke maruzê koletî û kerdişanê xiraban bîyî hetkarîya merdimîye bigêrê.

Jenosîdê êzidîyan hema zî Konseya Asayîşî ya Neteweyanê Yewbîyayeyan de nêame qebulkerdene. La tîmê tehqîqatî ya NYyî îlan kerd ke ê kerdişî qirkerdiş o.

Parlementoyê Ewropa, Meclîsê Parlementeran ê Konseya Ewropa, Meclîsê Temsîlkaran ê Amerîka barbarîya DAÎŞî ya vera êzidîyan sey qirkerdişî mojnaye.
-