Paylan: Heta ke şer dewam bikero ekonomî raşt nêbeno
Wekîlê HDPyî Garo Paylanî îfade kerd ke polîtîkayê ekonomîyî bîyî sebebê îflasê ekonomîyî û vat: ''Dewlete şarî ra pere wazena, çunke şer pere weno. Xazîne zî bîye veng.''
Hetkarê Hemserekan ê Pêroyîyan ê HDPyî yê Ekonomî ra Mesuldar û Wekîlê HDPyî yê Amedî Garo Paylanî ANFyî rê îflasê ekonomî ercna.
Paylanî pare kerd ke ekonomî rîyê xeyalê Erdoganî yê 'rejîmê yew şexsî ra îflas kerd.Paylanî vat: ''Erdogan xeyal kerdêne ke Tirkîya sey şîrketêke îdare bikero. Xora seba ke meclîs, mehkeme, çapemenî, komelê sivîlî kontrol bikero ekonomîyêka winasêne afernaye. Dinya de yew mîsalê naye çin o.''
Paylanî bale ante polîtîkayanê şerî û îflasê ekonomî ser û vat: ''Eke aramî, haştî û demokrasî çinbê sermaye zî remena. Nê pêro netîceya şerî ya. Seba ke Tirkîya sey welatêkê demokratîkî nêna dîyene çew sermayeya xo nêano ci. Xeylêk kesî bêkar ê. Serra 2014î de prosesê haştîye de budçeyê asayîşî yê Tirkîya 50 mîlyar bi la nika 220 mîlyar o.
Erdogan şarî ra IBAN wazeno çunke xazîne bîye veng. Pêro pereyê Tirkîya seba şerî yeno xerckerdene. No çinkerdişê demokrasî yo. Sermaye zî bi nê hawayî welatî ra remena.''
