Serekanê baroyan seba nawnayîşî veng da

Serekê baroyan verê berê Meclîsî de binê ablûqaya polîsan de heta serê sibayî mendî. Serekanê baroyan seba nawnayîşî vengdayîşê tewrbîyayîşî kerd û vat: ''Mudaxele ca verdê, ma do xo ver bidê.''

Pêşnîyazê baroyan ê pirrengan ê AKPyî Komîsyonê Edaletî yê Meclîsî de o bêro ercnayene. Serekanê baroyan waşt ke tewrê pêvînayîşanê Komîsyonî bibê û heta serê sibayî verê berê Çanakaya yê Meclîsî de binê ablûqaya polîsan de mendî. 

Polîsan verê rojnamegeran zî girewt ke xo nêresnê cayê serekanê baroyan û nêverda ke teberê bendan ra zî fotograf biancê. 

Serekê baroyan wazenê tewrê pêvînayîşanê Komîsyonî bibê, 5 serekanê baroyan reyde qasê 15 deqayan qisey bikerê û heta ke pêvînayîşan biqedê temsîlkarêkê/a xo pêvînayîşan de verdê. Labelê waştişî yenê redkerdene.

Vengdayîşê seba nawnayîşî

Herêma Anitparkî ya ke tede nawnayîş do bêro kerdene, binê ablûqaya polîsan de ya. Endamanê Heyetê Îdareyê Baroyê Anqara seba nawnayîşî vengdayîşê tewrbîyayîşî kerd û pare kerd ke eke mudaxele bibo ê do xo ver bidê.