Serwîsê 112î de erebkî îngilîzkî, almankî û rûskî zî tede bi zaf ziwanan de xizmet  yeno dayene la serwîs de xizmetê bi kurdkî nêno dayene. Wekîla HDPyî Semara Guzel na babete berdebî meclîs. Serekê Odaya Tabîban ê Amedî (DTO) Mehmet Şerîf Demîr û Sekreterê Şubeyê Amedî yê Sendîkaya Kedkaranê Xizmetanê Komelkî û Weşîye (SES) Mehmet Nur Ulus derheqê babate de qisey kerd û nêrazîbîyayîşê ramojna.

Serekê DTO Mehmet Şerîf Demîrî vat: ''Herême de zaf kesî kurdkî ra ber ziwanêk nêzaneno. Coka bi kurdkî xizmetnêdayîş cîyatîye û binpaykerdişê heqan o. No astengkerdişê heqê weşkerdişî yo. Ma sey doktoran zanenê ke weşkerdişê bi ziwanê dayîke hewce yo. Ma wazenê ke vera ney pêro astengî bêrê wedaritene.

Sekreterê Şubeyê Amedî yê SESî Mehmet Nur Ulusî vat: "Wexto ke nêweş tirkî nêzano nêeşkeno xo baş îfade biko. Na rewşe rewî ra wina ya. Ganî nêweşî bi ziwanê xo xizmet bigêrê. Rewşa lezabeze de ganî rewşa nêweşî hîna zelal bêra îfadekerdene. No zî bi ziwanê dayîke beno. Seba ambulansan zî wina yo. Ereykewtişê bi panc deqayan beno ke bibo semedê mergî. Yanî seba ke 112î de xizmetê bi kurdkî çin o beno ke no bibo semedê mergan."