Wekîla Sosyalîste Amînehe Kakabaveh bi 3 persnameyan teda û hêrişê vera çalakîkeranê cinîyanê ke Îran de tepişte yê, berdî Parlamentoya Swêdî. Amînehe venga Wezîra Karanê Teberî Ann Linde da ke seba ke tepişteyê cinîyî bêrê veradayene û Îran hukmê dardekerdişî nêaro ca wa Yewîya Ewropa û Neteweyanê Yewbîyayeyan reyde Parlamentoya Swêdî xîret bikera.

Sereka Torra Têkilîyanê Cinîyan Leila Qaraes û Serekê Verenî yê Sendîkaya Nuştoxanê Îranî û PENê Îranî Bahram Rahmanîyî venga dezgeh û rêxistinanê mîyanneteweyîyan da ke vera teda û hêrişanê Îranî bêveng nêmanê. Kakabavehe pare kerd ke mamostaya kurdkî Zara Mihemed rê cezaya zîndanî ya 10 serran dîyaye çunke goreyê qanûnanê Îranî dersê kurdkî qedexe yo. Kakabavehe da zanayene ke Zeynebe Celalîyan zî 13 serran ra nata zîndan de ya û ci rê xeylêk îşkence û teda ameyî kerdene. Kakabavehe venga Ann Linde da ke Zeynebe Celalîyan, Nasrîne Sotoudeh, Zara Mihemed û tepişteyê cinîyî yê bînî wa bêrê veradayene.

Bahman Rahmanîyî zî ard ziwan ke eşkerayîyê Îranî yê derheqê vîrusê Korona de raşt nîyê  û nê wextanê peyênan de vera cinîyan teda û şîdet zêdîyayî. Rahmanîyî vat: Menga peyêne de 3 domanê qijî hetê babî û dadîya xo ra ameyî qetilkerdene.''

Rahmanîyî da zanayene ke menga peyêne de 50 kesî ameyî dardekerdene.