Teslîm Tore yo ke ronayoxê Partîya Keda Komunîste ya Tirkîya (TKEP) û rayberanê têgêrayîşê çepî yê Tirkîya ra yew bi serra 2003î ra nat Swîsre de sey surgunê sîyasî ciwîyayêne. Toreyî wextêkî ra nat şaristanê Bernî de nêweşxaneyê Hislanden Beau-Site de weşkerdişê rîşa merdimwere dîyêne. Tore ewro serê sibayî nêweşxane de wefat kerd.

Tore serra 1939î de Meletî de ame dinya û serra 1963î de Partîya Karkeranê Tirkîya de dest pê sîyasetî kerd. Toreyî vera hêrişanê serê muxalîfan serranê 1970î de metodê alternatîfî  yê têkoşînî kerd û Artêşa Xelisnayîşê Şarî ya Tirkîya (THKO) ronaye. Toreyî dima ke Tirkîya vera rayberanê THKO qirkerdiş kerd şi Sûrîye û Rêxistina Xelisnayîşê Fîlîstînî (FKO) reyde têkilîye kerde. Toreyî serra 1974î de agêra Tirkîya û Yewîyanê Têkoşînî yê Artêşa Xelisnayîşê Şarî ya Tirkîya (THKO/MB) rona. Dima serra 1980î de Partîya Keda Komunîste ya Tirkîya ronaye. Darbeya Leşkerî ya 80î de reyna neçare mend ke şoro Sûrîye û faalîyetê xo yê sîyasî teberê welatî de dewam kerdî. Tore serra 1988î de agêra Tirkîya û serra 1993î de ame tepiştene û kerdene zîndanî. Tore serra 2003î de surgunê Swîsî bi û serra 2004î de derheqê ci de bira tepiştişê bi 22 serran ameye dîyene. Toreyî Ewropa de zî têkoşînê xo yê sîyasî dewam kerd. Toreyî heta nika zaf meqaleyî û kitabî zî nuştî.