TEV-ÇAND Ewropa Seyîdxan Boyaxcî yad kerd

TEV-ÇAND pê eşkerayîyêke Seyîdxan Boyaxçî yad kerd û îfade kerd ke o bilbilê Amedî, erjê kultur û hunerî yê şarê kurdî bi.

Têgêrayîşê Kulturî yê Demokratîkî yê Ewropa (TEV-ÇAND) seba wefatê Seyîdxanê Boyaxcîyî (Seydo Şîmşek) mesajêk weşana.

Mesajê TEV-ÇANDî wina yo:

''Ma pê xemginî xebera wefatê dengbêj û hozanê pîlî Seyîdxanî girewte. Dengbêj Seyîdxano ke nameyê ci yo raştikên Seydo Şîmşek o, sey 'Xalê Seyîdxanê Boyaxcî' mîyanê kurdan de şinasîyayêne. Seyîdxan Boyaxçîyî pê kilam û dengbêjîya xo zerrîya pêro kurdan de nameyê xo neqîşna.

'Gulê Keyeyê Dengbêjan'wextêkê dergî reng da kuçeyanê tarîxîyan ê Sûrî yê Amedî û kurdanê her parçeyê Kurdîstanî yê ke bîyêne meymanê ci, deyîrê xo vatî. Verê cû zî wexto ke karkerîye kerdêne mîyanê şarî de pê vengê xo şinasîyayêne. Seyîdxan Boyaxçî seba pawitişê kultur, huner û ziwanê kurdan bi wayîrê rolêkê girîngî.

O bilbilê Amedî, mîrasê dengbêjîye, heskerdoxê Têliyê û babîyê kurdan bi. O bi erjê huner û kulturê kurdan. Vengê ey her tim do bimano.

Ma verê ey de sereyê xo anê war, bi hûrmet û minetî ey yad kenê.''