Xelatê Rojnamegerîye yê Şehîdê Çapemenîya Azade û Mûsa Anterî ke her serre 5 beşan de yenî dayene, emser hetê rojnameyê Yenî Yaşamî ra yena organîze kerdene û kesê ke xelate girewtî, dîyar bîyî.

Musebaqa de beşê xeberanê tirkî de xelat dîyaye xebera ‘Tewqa Satelîtîye ra ver bi Wîrelessî: Bajaranê kurdan de pratîkê girewtişê xeberan’ ya Bekîr Avciyo ke Rojnameyê Gazete Karinca de xebetîyeno. Reyna beşê xeberanê tirkî de Xelata Taybete ya Jurîyî dîyaye xebera ‘Dosyayê kerdoxê înan dîyar nîyî, seba veşnayîşî erşawîyayêne SEKA’ ya Rifat Doganî ya Arti Gerçekî û xebera ‘Bi temamî fek Trakya ra veradayî’ ya Ugur Şahînî ya Bîrgunî.

Beşê xeberanê kurdî de jurîyî aşkere kerd ke goreyê krîteranê înan xebere nêameya dîyayene. Xelata Taybete ya Jurîyî dîyaye xebera ‘Li ser şopa dîrokê: Gundê Melekê Tawîs Tawîsî’ ya Zeynel Bulutî ya e-rojname.

Xelata fotografî zî dîyayî 2 kesan. Fotografê ke rojnameyê Gazete Fersude ra Hayrî Tunç û Cumhurîyet ra Vedat Arikî fotografê ke hewteyo 700. yê çalakîya Dayîkanê Şeme de antbî, xelate girewtî. Emser Xelata Taybete ya jurîyî dîyaye fotografo ke Nazim Daştanî Efrîn de antbî.

Beşê Karîkaturî de xelate dîyaye 2 kesan. Xelata karîkaturî dîyaye karîkaturanê Ozgur Evran û Beşîr Gerogluyî.

Reyna beşê Xebervanîya Cinîye de xelate dîyaye xebera ‘Bajarê çadiran yê Telhamutî de seba paketêkê şitî fuhûş cinîyanê bextwaştoxan ser o yeno ferz kerdene’ ya Arjîn Dîlek Oncele.

XELATA RÛMETÎ DÎYAYE DAYÎKAN

Jurîyî aşkere kerd ke xelata rûmetî dîyaya Dayîkanê Şeme.

Xelatê Rojnamegerîye yê Çapemenîya Azade û Mûsa Anterî do 22ê êlule de Stenbol de bi merasîmêk bidîyî wayîranê înan. Merasîm do saete 18.00 de Odeya Mîmaranê TMMOBî yê Karakoyê Stenbolî de bêro viraştene.